111 An alles kump een ende ...
Tweeduzend dertiene is begonnen. Het vrös en het is kold. En de kolde höldt an … . Der lik Gerrit gin ende an te kommen. En de kolde lik nog ergeder deur de politieke vorst. Rutte en konsjotten stapelt de ene politieke blunder op de anderen. Of is het geven en nemmen deur de veeveedee en de peeveedeejaa in het regeerprogram nieet het opstapelen van blunders? Of wel soms, of nieet dan? Het ‘Kabinet Rutte II’ zol wel ens gin lang lèven beschoren wèzen kunnen, denkt Gerrit. En hee kan merken dat Samsom al zien höör deur De-la-li (De-Laajen-Lichter) hef loaten ofscheren, want van zien oerkracht is niks meer oaver: Hee is een spölbal eworden van rechtse voetballers en linkse noatrappers. En de vrouwelijke arbiter Beatrix dreigt de dupe te worden van de grollen en grappen van de politieke veldspöllers. Ze mot het allemoale möör dragen onder diee konkelfoezers in de Tweede Kamer. Zee hef disse keer egensnieet mee meugen doon met het spelleken ‘Mark erger Diederik niet’ oftewel zee is egeen gin scheidsrechter ewest bie de teleurstellende kabinetsvorming. En het resultoat is ter dan oke nöör! En der is gin logische meerderheid veur het kabinetsgedoo in de Eerste Kamer. En döör maakt de oppositie dankböör gebruuk van. Gerrit hef al een paer keer emerkt dat diee hele konkelfoezerieje de Keuniginne nieet ansteet. Möör meschiens dut zee Rutte en Samsom nog bie de bok en löt zee diee keerls ens flink opneien. Hee weet dat zuk smerig denken oaver het gezag hem helemoale nieet past, möör zoo lange as diee luu enkeld möör bezig bint met ‘Ééntjen veur oe en ééntjen veur mien’ en ‘de rest mag nieet meedoon, möör mot wel ‘joa’ knikken’, hooft ze op zien goedkeurig nieet te rèkenen en zal hee alles doon en niks loaten um disse bende van Kärdoes, dit koor van knikker-de-knak ‘um zeep te helpen’. Gedachten bint immers nog helemoale vriej. En hee zal zeker nieet meer stemmen op een groepering diee haer idealen verkwanseld um an de macht te blieven.En dan bedieent Beatrix hem op zien wenken. Ze wördt de eenendertigsten viefenzeuventig en het is asof of zee Gerrit zien gedachten eroajen hef, want ze kondigt an dat zee der mee ophöldt…. . Willem-Alexander zal haer opvolgen, ende april. In gedachten zeg Gerrit: “Beste Keuniginne, Majesteit is al dat gekonkel zat; dat heb ik allange wel emerkt. Diee Konkelfoezers weet nieet ens wat democratie is, loat stoan dat ze der an mee wilt werken. Majesteit hef gelieke. Zee is een democratische Vrouwe, diee haer democratische Zönne de Krone wil oaverdragen, opdat hee as jonge vent diee Haagse bloaskaken ens goed kan anpakken! Bravo, Majesteit kan het rustig an hem oaverloaten. De nieje keuning zal de dames en heren in de politiek deur zien veurbeeld ens een puupken loaten roeken!” En hee lacht as hee disse zinnen härdop uutsprek.
Veur hemzelluf zal der noe oke een boel veranderen. Zien verhalen diee onder Juliana en Beatrix spölden bint verzameld in “Koninkrijk Konkelfoes” en “Koninkrijk Konkelfoes 2”. Diee verhalenreeks, eerst in het Nederlands eschreven, later in het Dèventers, mot e noe as oferond beschouwen. Noe, noa de ankondiging van Beatrix, mot e met “Koninkrijk Konkelfoes 3” beginnen. Diee gebeurtenissen zal e weer net zoo nauwkeurig volgen as e altied edoan hef.Willem-Alexander en Maxima zult hoapelijk lang getuge meugen wèzen van weinig konkelfoezerieje en völle oapen en eerlijke democratie in Nederland en in de wereld! An de gewone mensen in Nederland zal het nieet liggen: een oavergrote meerderheid steunt de Oranjes bie hun dieenende werk veur de mensheid.
An alles kump een ende, behalve an een metworst, want döör komt ter twee an. “Beatrix, bedankt”, zeg e uut de grond van zien härte.
