106 Lieefhebberieje
Dan löp döör in de verwachtingstied veur ‘Kässemis’ zoo möör inens De hoffotograaf van Diepenveen deur “De Pellerije”. Noe begrip Gerrit wöörumme de heer Revenberg, ene van zien buren, zoo druk bezig ewest is noast alle kerstverlichting en –versiering in de oaverdekte binnentuin langes de rechthokige perken, de hekken en de balustrade menneken an menneken keerskes, honderden, in pötjes neer te zetten! Hee wil, want zoo is Gerard Revenberg, veur disse gemeenschap de kerstsfeer in foto’s weer loaten geven. Gerrit weet nieet of hee dat met de bewonerscommissie oaverlegd hef, möör dat kan hem nieet schèlen.
Buten donkert het al aerdig en in de binnentuin bint de lampen an. Gerard stek met wat hulpe van anderen de keerskes an. Ondertussen löp Fotograaf Harry rond um de juuste plekskes op te zeuken van wöörof hee de plaatjes schieeten kan. Gerrit löp ter tussendeur, want hee wil dat niks hem ontgeet. Meschiens wil e alles later nog ens schriftelijk västeleggen. De heer Mulder geet heel sikuur tewerk! Hee hef dan oke een heel geveulige apparatuur. De “Historische Vereniging Diepenveen” hef an hem een hele goeien. Harry hef alles veur diee club oaver en zien strèven is alles wat of hee op zich nemt, zoo goed meugelijk te volbrengen. En … hee nemt ter de tied veur. Hee is nieet te beroerd um belangstellenden veur zien werk het een en ander uut te leggen. De films diee e oaver het dorp emaakt hef bint nieet enkel juweeltjes wat opnamen betreft, möör oke wat compositie betreft. Too-egeven, de steun en hulpe van anderen kan e nieet ontberen, Gerrit hof möör te denken an mensen as Pier Karenbelt, Wilbert Derksen, Gerrit Hemeltjen, de dames Bussink, Riek Visser en goa zoo möör deur. Ook andere leden van de historische vereniging hebt een massa veur de club oaver! Al diee leden verdieent het keuninklijk onderscheiden te worden as ze dat al nieet bint.
As Harry klöör is, kump e effekes een pröötjen met Gerrit maken. Hee vertelt oaver het feit dat e van zien hobby zien werk emaakt hef. Dan sprek e met Gerard Revenberg of hoeneer as ze weerkump um de foto’s te loaten zieen en um de mensen de gelègenheid te geven ze te bestellen tegen een redelijke pries, zoodat de luu het volgende jöör de foto’s gebruken kunt as kerstkaerte. Dan geet e vort.
Gerard kump èven bie Gerrit en zeg dat e veur de gezelligheid de waxinelichtkeerskes möör löt opbranden, hee zal der döörnoa wel niejen inzetten.
Gerrit geet nöör binnen. Hee zut dat Ali alweer buten oadem is. Haer härtfalen werkt dubbeld slecht bie de reuma diee ze oke al hef. Hee is ter veur haer beheurlijk verdrieetig oaver, möör an de andere kante veult e zieneigen härtstikke gelukkig: Ze bint op tied van de Van Bommelweg nöör “De Pellerije” verhuusd, hee kan nog heel goed uut de voten, koaken veur hun kleine huusholding dut e al jören, de kinder stoat altied klöör um hun olders bie te stoan. Hee hef dus niks te klagen en Ali zeg altied, allewel ze heel völle piene hef en hoaste te stief is um haereigen te bewègen, dat zee oke niks te zeuren hef: “Niet klagen maar dragen! En jij draagt het met mij”. En as ze dat zeg, schieet hem de troanen in de ogen. Hee weet nieet of het van verdrieet of geluk is. En hee begint te lachen. “Wat heb je?” – “Ik hou van je”, zeg e. – “Zal wel”, lacht ze weerumme. Dan geet e nöör zien werkkamertjen achter de kompjoeter zitten. Hee mot neudig an zien seit werken. Allewel, hee hooft natuurlijk niks, hee hef net as Harry Mulder van zien lieefhebberieje zien werk emaakt. As e het heufdstuksken of hef en het op de seit ezet hef, slöt e zien kompjoeter netjes of. Dan geet e nöör de woonkamer. Hee zut dat Ali zit te borduren. Ze kik op. “Toch maar proberen, maar mijn vingers worden wel steeds stijver”. Hee kust haer op haer zilver höör: “Je bent een schat”. En weer welt de troanen um haer dapperheid… . ‘Mien grootste lieefhebberieje…’, denkt e
Hee geet koffie zetten. Èven later zit ze teevee te kieken. Het Journaal sloa ‘j immers nieet oaver.