104 Soepzeutjen
Het begint al noa de landelijke verkieezingen veur de Tweede Kamer op woensdag, negen juni tweeduzend tiene, tenminsten veur Gerrit. De rechtse, in zien ogen völs te individueel gerichte, onmoatschappelijke, kapitalistische en märktgerichte groeperingen, wilt met alle geweld ‘rechts’ an de macht en ze sprèèkt dat ook rustig uut. De enen hef genog van dat “linkse gedoe”, de ander wenst nieet langeder “linkse speeltjes”, Geert wil het “multicultigedoe” nieet meer en goa zoo möör deur. Job wil dat rechtse Rutte het möör met wilde Wilders uutzeuken mot en mot met asse op het heufd het veld rumen. Maxim wil alles wel, as zien “Christelijke Domme Achterkamertjesclub” möör an de macht blieven kan en de rest van de vaderlandse politieke groeperingen steet al bie veurbaat butenspel en bie dat butenspel zetten doot de rechtse fluiters Uri, Ruud en Ivo dapper mee. De enigsten diee een zuver en eerlijk spelleken spöllen wil is Herman, diee Dèventer jonge, van wiee de vader, Tjeenk Willink, nog directeur is ewest van het Dèventer Energiebedrief oftewel de gasfabriek
En diee rechtse roomse rakkers Ruud en Maxim volgt Gerrit noe ens goed bie hun handelingen. Hee hef ter gin goed woord veur oaver! Veur het eerst van zien lèven hef e het geveul dat e zien eigen nest beschit! Hee is immers oke orthodox christelijk opevoed, allewel nieet rooms katholiek. Joa, hee hef van diee leer gin dogma’s meer oavereholden, möör hee hef de leer van de gerechtigheid, solidäriteit en eerlijk delen toch beholden. Ruud, Maxim, Mark en Wilders hebt döör niks meer van oaver. Het lik wel asof het altied wèzen mot “IEDERS” veur zich: “Ik en de erreme rest stik!”
En wat is noa een paer moand gekonkel in het Catshuus het resultoat: een minderheidskabinet met gedoogsteun van de Club van Geert. De “Pärtieje Veur de Vriejheid”?! Loat hem nieet lachen. De vriejheid veur wiee? Veur de mensen diee op dat menneken Wilders wel kunt stemmen, möör nieet ens democratisch leden worden kunt? Veur de immigranten diee Geert metene het land weer uut wil gooien? Veur de geleuvigen van andere godsdieensten as christendom en jodendom? Möör Mark zut het allemoale wel zitten en Maxim zut het allemoale wel stoan. De M&M’s smaakt bliekböör de achterban van Mark wel zeute, möör diee van Maxim nieet. Gerrit veult an zien water dat dit allemoale veur het christelijke achterkamertjes deel van de club van Maxim helemoale verkeerd of geet lopen.
As hee op donderdag de veertienden oktober het nieje minderheidskabinet Rutte op het bordes van het paleis zut stoan, zut e de koniginne as het wäre op de rugge van Rutte zitten en hee heurt haer härdop denken: “Wöör hef Lubbers mien noe mee opezadeld!” En in gedachten zut e Job Cohen noast zien Lidy zitten en hee heurt hem zeggen: “Als mijn schoonvader, de Dèventer neerlandicus Gerrit Lodewegens, dit nog eens had kunnen meemaken, zou hij net als ik nu zeggen: “Je kunt beter domweg gelukkig zijn in de Dapperstraat, Beatrix”.
En hee schaamt zich dalijk veur diee gedachte, want zukke dinger zol de èvenwichtige Cohen nooit zeggen.
Noa de beëdiging van het kabinet en de presentatie döörvan an het grote publiek, geet Gerrit möör weer an het kompjoeteren. Möör zien gedachten stoat nieet stille. Nederland, dat e lieef hef, glit steeds verder of. Hee neumt het met recht vake ‘Koninkrijk Konkelfoes’! In het butenland sprèèkt ze der al schande van hoe of dat land ummegeet met ‘De Mens’. Hoe zekt ze dat oke al weer in het Dèventers as bewust rechten met voten etrejen wordt en der een briej ontsteet diee nieet meer te proemen is veur de mensen. Het schut hem inens te binnen as e plotseling zien al lange elejen oaverlejen vader zut opriezen. Diee zeg dudelijk: “Gerrit, ze maakt ter in de politiek altied weer een soepzeutjen van”.
Hee zet de kompjoeter uut, want plotseling hef e veur vandage de lol derof.
