102 Töchken deur Oaveriessel
Bie het bezeuk van de beide Mientjes hebt ze het deroaver ehad hoe of het toch met Gerda Rutgers in Hengel, Hengelo, wèzen zol. Döör hebt ze lange tied niks van eheurd. Gerda is oke een volle nichte van Ali. Haer moder was een Smit en Gerda, Ali en Mientjen Hammink bint vanof hun vrogste kindertied al dikke vrindinnen. Gerda is de oldsten van de driee, dan kump Ali en dan Mientjen. In zesenveertig hef Gerrit hun alle driee goed leren kennen. Toen ging hee nog egensnieet met Ali. Wat wazzen Gerda en Mientjen in zeuvenenveertig ontdoan, toen Ali verkering met hem kreeg! Ze dachten dat de band tussen hun drieeën veurgoed deuresnejen was. Möör ze hadden al gauw deur dat Ali hun nieet in de steek liet. En de dikke vrindschap is noe al minstens zestig jöör an!
Vandage, twalef juli tweeduzend tiene, wilt Ali en hee onverwachts bie Gerda op bezeuk. Het lieefste wilt ze noa de middag in Hengelo ankommen, want ze weet hoe Gerda is: metene klöörstoan en het gemeste kallef slachten. Gerda is getrouwd met Harry Houtkamp, een feine vent met een geweldig geveul veur humor. Hee is wat härdhörend, kent gin Twents, want hee is in het westen jong ewest. Het is meujlijk veur hem het Nedersaksisch te verstoan, wat meer kump deur zien gebrekkige geheur as deur het ontbrèken an passieve kennis van diee taal. Gerrit pröt dus altied Nederlands met en tegen hem en döördeur dus oke met Gerda, diee as een echte Twentsen opegreujd is.
Om tien uur in de mergen stärt hee de auto. Zien “Garmin” gebruukt e vandage nieet, want een vakantierundjen mot op de bonnefooi. Veur Ali mot het een verrassingstöchken worden en veur hemzelluf oke. Hee kös de weg nöör Wesepe via de Boxbergerweg. Van Wesepe geet het dan langes de volgende toeristische, rustige route: Roalte, Mariënheem, Luttenberg, Avonturenpark Hellendoorn, Daarle, Hoge-Hexel, Vriezenveen … . Döör begint de lucht te betrekken en de wind begint te weien en de eerste règen völt. Het wördt steeds slimmeder. In Aadorp, het is dan tussen hallef twalef en twalef, beslut e de auto an de kante te zetten: het geet in het zwerk verschrikkelijk tekeer. Hee zet de auto wöör gin bomen stoat, en hee hef angst. Hee zut dat Ali oke bange is. Het noodweer duurt möör èven. Dan völt de wind vort en een zachte règen daalt neer. Ze stapt uut, doot gauw de jassen an en samen onder een grote paraplu loopt ze nöör een cafetaria an de oaverkante. Binnen is bie hem de angst al gauw weg.
Een patatjen met een frikandel geet ter noe wel in, het is immers ètenstied. Gasten diee noa hun binnenkomt, vertelt oaver de kleine tornado diee net oaver Hengelo etrokken is. Diee hef een spoor van vernieelingen achtereloaten. Gerrit is beniejd wat Gerda en Harry an de Twekkelerweg döörvan mee-ekregen hebt!
Tegen hallef ene riejt ze verder, de ravage integen blik al gauw. De cycloon hef ongeveer de tegengestelde route evolgd diee zee noe riejt. Het lik wel of hier een kleine oorlog hef ewoed. Ummeweide bomen, ofebroaken takken, kapotte daken, scherven van dakpannen, ineweide roeten, nöör buten wapperende gedienen. Het is een chaotische toestand in de stroaten diee ze deurkomt. De Twekkelerweg kun ze egeenieet in. De oerolde dikke boom bie de Waarbeekschole is ummeweid. Gerrit mot in een ziestroate pärkeren. Dan loopt ze nöör Gerda haer huus. Harry en Gerda stoat hun ellende net te bekieken: pannen van het dak of, twee ineweide roeten …. Ze bint blie dat Ali en Gerrit deran komt. Ze wilt nieet hebben dat Ali en Gerrit helpt de rommel op te rumen. Döörveur geet Gerda metene haer klusjesman bellen. Dat is haer breur, oke een Gerrit. Dan geet zee koffie zetten. Ali hef gebak mee-ebracht en èven later zit ze met zien vieren gebak te èten. En haer breur is ter oke al gauw. Diee geet metene an de slag. Harry en hee helpt zoo goed en zoo kwoad het geet.
As ze in de loop van de middag weer wegriejt, bint de roeten dichte en de stroate veur de deure schone. Dat is de keerzieje van närigheid …, een beetjen hulpe met lieefde …!
