99 Elektrische fietsen
Deur härtfalen kump Ali bie het fietsen gauw achter oadem. Een paer kilometer höldt zee het nog möör vol. Lucy röt hem an um veur Mama een elektrische fietse te kopen. Döör zit een bekrachtiging op, of op de wielen of op de trappers, diee de inspanning van het fietsen, veural tegen de wind in, beheurlijk vermindert. Vandage goat ze huneigen oriënteren bie “Riesewijk” op het “Bedrijventerrein” in Colmschoate. Ze riejt met de auto nöör de Essenstroate nummer viere in Dèventer. Vlakbie de zaak kunt ze pärkeren. As ze binnen bint, kump ter metene een vrindelijke jongeman op hun of en hee vrög wat ‘Mevrouw’ en ‘Meneer’ wenst. Ali vrög nöör veurlichting oaver elektrisch anedreven fietsen. De medewerker zeg dat hee der èven een expert bie halen zal en geet nöör de ofeschutte werkruumte achterin de zaak. Èven later kump der een man diee zich veurstelt as Paul Zweverink. Hee begint een uutvoerig verhaal oaver merken fietsen diee te koop bint en an welke veurwaerden diee voldoot. Hee zeg der nog bie veur welk merk “Riesewijk” officieel dealer is, möör diee name ontgeet Gerrit, umdat Paul der dalijk achteran zeg dat hee nog een heel goed merk in de anbieeding hef, namelijk een inruilfietse van een mevrouw uut Diepenveen. Diee wil een modernere versie van haer “Flyer”. Paul vertelt der eerlijk bie wiee de dealer van “Flyer” is. Dat maakt Ali niks uut. As zee een nieje “Flyer” köch, wil zee diee toch bie “Riesewijk” bestellen. Paul begint met te vertellen dat “Flyer” een Zwitsers merk is met elektrische bekrachtiging op het trapmechaniek. Der is pas een nieje serie uutekommen met driee standen veur de bekrachtiging: standaard, eco en high. Dat steet Gerrit biezunder an. Hee vertelt Paul dat ze hem aneroajen hebt zelluf oke zon fietse te kopen, umdat het samen fietsen döördeur völle makkelijker is wat de snelheid betreft. Paul zeg dat hee döör oaver begonnen wèzen zol, as Ali veur haer eigen een fietse ekocht zol hebben.
Op de ineruilde fietse van de Diepenveensen mag Ali een proefritjen maken, noadat Paul de werking en hantering van het een en ander dudelijk uutelegd hef. Op de pärkeerplaatse rit Ali wat rundjes en Gerrit genit van de lach op haer gezichte. “Je moet hem ook eens proberen”, zeg ze tegen hem. Paul zet het zadel wat hogeder en Gerrit rit oke wat rundjes. Hee vindt het fantastisch. Ali zeg dat ze de fietse graag kopen wil, niej dan, möör dat ze der een ander zadel op wil hebben, nieet zoo härd. Dat kan. Gerrit bestelt der veur hem ook ene, damesmodel, möör een moate groteder.
In de winkel is een ofeschoaten zitjen. Paul dirigeert hun döör hen en onder het genot van een lekker köpken koffie wordt het hele zwikjen op papier ezet en met handtekeningen bekrachtigd. Het is een heel duur geintjen, möör het geld is zeker goed besteed. Ze mot wel rèkenen op enkele wèken lèvertied, möör Paul zal hun wel bellen wanneer e de fietsen in Diepenveen bezörgen kan. Hee zal dan gelieke een niej fietsenrek, geschikt veur twee fietsen van dit soort, meebrengen en de werking döörvan op hun auto demonstreren. Kortumme, hee budt een geweldige söörfis!
Bliej riejt ze döörnoa nöör de camping weerumme. Het völt Gerrit onderweg op hoevölle elektrisch bekrachtigde fietsen der al op de fietsepajen riejt. En een snelheid dat diee hebt! Hee snapt noe oke wöörumme het goed is dat hee oke zon fietse ekocht hef.
Het is al twalef uur als ze op de camping bint. De zunne steet hoge an de hemel en hee zet het kampeertöfelken en de ligstolen in het bos achter de caravan. Ze goat ter lekker bie zitten en hee pakt zien mobieltjen en belt met Aduärd. Zien kleindochter Emma nemt op. Hee vertelt van hun nieje ankoop. Ze reageert enthousiast: “Heel verstandig Opa … . Dan kan Oma weer lekker een heel eind fietsen!” Ze zal haer olders het bericht deurgeven. Vief minuten later kreit zien mobiele hane. Het is Gerrit: “Wat doen jullie met de oude fietsen…?”
