89 "AantVen"
“De Marsbelte” is een ‘natuurcamping’. Dat vertelden Gerrit oke an kennissen uut Diepenveen. Dat hef e eweten! As e op een middag in Diepenveen kump, wördt e in de slagerieje van Härmsen anesproaken deur een hem bekende man: “Wat heb ik gehoord, is de familie Kuijk tegenwoordig aan het naaktkamperen?” - Gerrit snapt dalijk dat de man de klokke hef heuren lujen en nieet weet wöör of de klèpel hangt: “Joa”, zeg e dan oke zonder blikken of blozen, “wiej dachten met ons beiden ‘Loade wiej ens op een camping goan stoan, wöör de dieren nog allemoale in de blote konte loopt’ en wöörachtig de eekhoorns, de kenienen, de egels, de veugels en neum möör op, ze loopt allemoale nog in het velleken of de veren diee ze Van Moder Natuur mee-ekregen hebt. En … ze sprèèkt hun eigen taal nog .. en nieet zooas iej ‘Hooghaerlemmerdieks’”. Gerrit zut hem van kleur verschieeten … . Diee keerl is in het Diepenveense opegreujd, möör hee schaamt zieneigen veur zien moders taal. En hee is zoo dom as bonenstroo. En umdat de man zien mond höldt, geet Gerrit möör deur: “Iej mot weten dat een mense diee graag in zien bleutjen löp, en dat oke dut as de temperatuur der nöör is, van zichzelluf welis zeg dat e nudist is of anhanger is van het nudisme. Zon mense löp helemoale bloot as dat kan en wanneer het too-estoan is! En döör is niks mis mee. Der bint ter oke diee naturist bint. Diee mensen bewèègt huneigen zoovölle meugelijk helemoale bloot in de natuur, an het strand bieveurbeeld of in de bossen. Der bint oaveral speciale naaktstranden veur disse zoogeneumde ‘naturisten’. Der bint oke speciale campings veur zukke luu, de ‘naturistencampings’. Wiej hebt ekampeerd op een ‘natuurcamping’. Dat hef niks met ‘naturisme’ te maken. Een natuurcamping is een nieet te grote camping veur natuurlieefhebbers: mensen diee holdt van alles wat greujt en bleujt. Iej mot ter een speciaal kampeerbewies veur hebben, wat eteund worden mot um döör te meugen kamperen! Iej betaalt ter extra veur. Met naaktkamperen hef dat niks te maken. Iej meugt ter oke nieet langeder as vier wèken achterene kamperen, want dan moj weer plaatse maken veur een ander. Het hef dus niks te maken met in ‘de blote kont’ lopen. Möör wat dan nog? Wiej bint toch allemoale in ons blote velleken op de wereld ebracht, of nieet dan?”
Alle klanten bie de slager in de winkel begint te lachen, veural as Gerrit zien bestelling dut, want hee is net aan de beurte: “Twee gemärineerde kippenpoten, ze mot nieet anekleejd wèèn, want anders lust mien vrouwe ze nieet!” Dan vertelt Gerrit verder. Dat e met zien vrouwe ens met de caravan estoan hef op een kleine camping in Zuud-Duutsland, in Deggershausen. Diee camping bleek veur de hellefte een naturistencamping te wèzen. De hele camping döör is umheind deur een driee meter hoge schutting. Binnen diee ‘Zaun’ was het naturistengedeelte weer ampärt ofeschut met grote zeilen, zoodat de mensen diee zich helemoale vriej veulen wollen, ook echt naakt en vriej wèzen konden. De nieet-naturisten wären zoodoonde oke helemoale vriej! “Wiej hebt ter heerlijk driee wèken ekampeerd”, zeg e.
“Wöör stoat U noe, Meneer Kuijk”, vrög de slager. “Driee kilometer van huus an de Möllenweg nummer zeuven in Olst, op de minicamping “AanTven” met heufdletter –A- en heufdletter –T-. Heerlijk. Het is ter zoo lekker rustig. En … iej woant oe der in het butenland. Het is döör precies de Franse Jura … . En .. der is een prachtige toiletveurzieening! Het is vlak bie huus, möör … iej bint ter helemoale uut. De familie Volmerink is ter nog egens zoo lange terugge mee begonnen, möör “AanTven” is noe al een kampeerbegrip in het land. A’j internet hebt, mo’j der möör ens op koekelen en anders fiets iej der möör hen um te kieken. Kost niks en de mensen bint ter härtstikke vrindelijk. Wiej blieft ter töt begin oktober stoan!”
Gerrit rèkent of, kik nog èven nöör de hooghaerlemmerdiekse zoerproeme noast hem, zeg: “As ’t zunnig is, meug iej bie ons alle kleren uut, möör schone onderbrook anholden!” En hee geet onder schaterlachen de winkel uut.
