70 Ridderorden
Vriedag de viefden mei. Gerrit zit veur de teevee: het is “Bevrijdingsdag”, de vierenzestigste herdenking van de ondertekening van de capitulatieakte deur de Moffengeneraals in “Hotel De Wereld”, in Wageningen. Gerrit hef de veurbieje nacht nieet ekeken nöör de ontstèking van het 65-ste “Bevrijdingsvuur” in Wageningen, allewel hee het best ‘geinig’ vindt dat estafettelopers zon hele route van Normandië as een lopend vuurtjen volgt, härtstikke symbolisch en heel goed um de herinnering an het weerummekriegen van de vriejheid lèvendig te holden. Möör hee is noe ene keer gin nachtbraker.
Hee kik noe wel nöör het defilee in Wageningen en hee veult troanen in zien ogen branden. In de eerste plaatse umdat Hans Hillen as Minister van Defensie dat defilee ofnemt. Iej holdt het toch nieet veur meugelijk dat een minister uut dit “gedoog”-kabinet het durft te woagen hier te goan stoan um de massa too te sprèken! Hoe kan zon vent oaver “in vrijheid leven” proaten, wiel hee geliekertied samenwerkt met een verwilderde verwärde volksverlakker diee vremdelingen gin lèven in vriejheid gunt! Verder is het natuurlijk wel fantastisch dat ter nog zoovölle olde Canadese , Engelse en Amerikaanse veteranen bint uut de Tweede Wereldoorlog. De jongsten döörvan bint noe oke al viefentachtig minstens.
In wagens van ‘Keep them Rolling’ trekt ze veurbie. Tussen de greune auto’s märcheert militaire muziekkorpsen an het heufd van jonge märiniers, huzären, infanteristen. Een mooi gezichte bint alle schitterende ridderorden en andere onderscheidingen diee deur jong en old edragen wordt. Gerrit zut Marco Kroon tussen de geneudigden stoan, de commandokapitein diee op de tienden februäri jongstleden beneumd is töt Ridder in de Militaire Willemsorde. Op vriedag 29 mei 2009 zal de Koniginne hem töt ridder sloan wegens zien verdieensten in Uruzgan. Hee hef zien lèven veil ehad veur zien ondergeschikten! Gerrit vindt het dan oke zeer terecht dat zon mense een ridderorde ‘krig’.
Zien eigen ridderorde kreeg e ende april 2002, veur zien verdieensten as curator oaver Hans Smit gedurende tweeënveertig jöör, zien werk veur sport en jeugd, zien werkjes in het Nedersaksisch, onder anderen ‘Een Dèventer Jonge in Oorlogstied’, ‘Grammatica van het Dèventer Dialect’ en nog een boel andere dinger. Hee hef altied emeend dat zien ridderschap in de Orde van Oranje-Nassau een verdieenste van Ali is en nieet van hem. Feitelijk was zee de draagster van het ‘werken’ rondumme Hans en zee stimuleerden zien bemeujenissen met de taal. Wat dat betreft wären de werken van mannen vake de verdieensten van hun vrouwen. En noe mot hee onder het kieken nöör het passeren van al diee veteranen in de stromende règen op het scherm wöörachtig toch weer an diee veteraan Dabwe Wiah döör in Liberië denken! Zien vrouwe, Mineke, en hee hadden allange de heugste onderscheiding motten hebben wègens hun verdieensten veur de achterebleven mensheid, zee postuum en hee bie het lèven … . Jammer dat Tonia zien gedachten nieet kent! Meschiens krig hee haer nog ens te sprèken en dan kan hee zien respect veur haer moder en vader en … veur haer echt ens uteren.
Het defilee glit veurbie. De vrolijke märsmuziek schalt deur de kamer. In gedachten märcheert hee mee. En lange noadat het feestelijke gebeuren veurbie is genöt e nog noa veur de bolle roete zonder wat te heuren of te zieen … . Genieeten dut e, gewoon genieeten. Dan geet de veurdeurbelle. Hee dut lös. Het is Rika, de onvolprezen huusholdelijke hulpe. Ze vrög of Ali thuus is. Hee vertelt haer dat ze ieder moment thuus kan kommen, dat ze nöör de huusärts is. Dan kump zien vrouwe der net an. Gedrieeën goat ze nöör binnen. Rika oaverlegt met Ali wanneer ze de volgende wèke kan kommen um te helpen. ‘Diee verdieent oke een ridderorde’, denkt hee, möör hee zeg niks … . Vrouwen bint gold weerd! Loaten zoo.
