60 Gelukkig mense
Crödde stek de weg oaver en geet bie AH-Middeldorp nöör binnen. Hee geet nöör de greunte- en fruitofdeling um wat sinaasappels te halen. Zooas altied is de heer Hekkert in zien lichtblauwe jesken bezig met het mooi rangschikken van greunte en fruit. De heer Gerrit Hekkert zweit de scepter in disse ofdeling en iej kunt zieen dat e der plezier in hef. Gerrit, zoo mag Crödde hem neumen, want hee kent hem al minstens veertig jöör. Trouwens, de bedieenden in disse zaak en achter de kassa kent e praktisch allemoale, allewel nieet altied van name. As e nöör de kassa löp, kump e Eppe Harmsen tegen. Diee mot oke nieet dikkeder worden, zut e. “Hallo, Crödde”, rup Eppe, “Hoe geet het?” “Prima, en met oe dan?” Eppe gef gin antwoord, möör zeg: “Dat wären nog ens tieden dat Gust Meester Rojan bereej en ik mien koetsen had en kon loaten riejen. Het is oe toch wat dat diee hele familie umme-ekommen is bie diee gasontploffing. Enkeld Judith Janzen en haer zönne Jan bint espöörd ebleven. En dat net diee zeuven oldleerlingen derop visite wèzen mosten! Diee jongeluu hadden zon prachtig lèven veur hun. Trouwens, diee Eddy en René lèèft nog! Möör wat bint dat olde mennekes eworden. Ze komt hier nog altied op een zörgboerderieje!”
Crödde veult dat de troanen hem achter de ogen brandt en hee zeg zachte dat gelukkig het werk van de familie Meester deur Judith verder edoan wördt en dat ter èvenwels fondsen zat bint diee noe goeie doelen dieent.
Dan rèkent e of bie de kassa. Het bint bonus-sinaasappels, appelsienen zeg hee altied nog, en hee kan tegeswoordig oke kleine bedragen pinnen met zien Ing-pinpas. Makkelijk is dat noe allemoale. Gin vergeliek met enkele jören weerumme! Hee kan butendat geld ‘èten’ uut de mure, wat e dan bie AH buten geregeld uut de ‘automatiek’ van de ‘Rabobanke’ dut.
Trouwens, Dorp Diepenveen hef al lange tied egeen gin banke meer um geldzaken of te handelen. Döörveur mo’j nöör Dèventer, al een hele tied trouwens. Alle grote banken hebt enorm bezunigd en het wördt nog altied slimmeder. Crödde is bliej dat e is ‘internet’ goan ‘bankieren’ bie twee banken, möör noe heur iej al weer dat het helemoal nieet zoo veilig is met inlog-namen en -wachtwoorden te goan werken. Met valse banksites probeert misdoadigers, veural Oost-Europeanen, oew codes te kraken. As hun dat lukt, goat ze der met oew hele vermeugen vandeur, zoo van ‘internet’ ‘uutternet’. Tot noe hebt de banken de stroppen van de klanten noa het ophangen tiedig deuresnejen: de cliënt krig de schade deur de banke vergoedt, möör de RABO wil döörmee stoppen, want diee beweert dat de klante zieneigen de strop hef umedoan en zich opehangen. Veranderen van banke mot een mense toch echt oaverwègen. Iej kunt bie diee bandieten der heel onnozel intippelen!
Crödde löp noe richting dorpskerke. Hee kump langes de löge Rabo-banke. Hee hef eheurd dat het gebuiwken nog steeds nieet verkocht is. Hee hoapt dat ter een fietsenmaker inkump, want Riemersma, diee èven verderop in het dorp zat, hef zien zaak opeheven. Gerrit en Joke komt beiden oke in de buurte van de pensioenlèèftied. Tom en Marjo Kleinbussink bint hun zelfbedieeningskrudenierswinkel al estopt en oaverwèègt noe tèvens hun drankenzaak op te heffen. Zoo verdwient in het dorp de ene kleinhandel noa de anderen. Mooi dat ter een koakstudio veur in de plaatse ekommen is! De zaak is van Boschloo en hee löp goed! Jammer, meneer Boschloo mot heel ernstig zieek wèzen.
Oaver het Kerkplein en het Kerkpad löp Crödde nöör de Sallandsweg. Wat verderop nöör de spoorliene geet e linksof het Stratenusbos in. En het is net, as wordt e noe in de natuur nog völle gelukkiger. Hee wandelt töt an het spoor, stek de oaverweg oaver en wandelt nöör de olde plekke wöör Gust Meester met zien familie elèèfd hef. Der is niks van weer te vinden! Onkruud hef de hele boerenstee oaverwoekerd. De boerderiejen der umhen bint ter nog.
