59 Veranderingen
Het is moandag, de drieeëntwintigsten van sprokkelmoand, februäri dus. Crödde zien auto mot vandage nöör Kemper in Diepenveen. Döör is hee al klante vanof negentien tweeënvieftig, toen de garage en werkplaatse nog onder beheer stonden van de oprichter; diee is noe al lange dood. Zien zönne Jan zweiden döörnoa jörenlang de ring- en andere sleutels en noe is al völle jören Rutger de baas. De garage hef in de loop van de jören een heel ander anzieen ekregen deur verbouwingen en … hypermoderne appäratuur. Butendat steet de garage noe al tien jöör nieet meer in de gemeente Diepenveen. Nee, zonder verplaatst te worden lig ‘Garage Kemper’ in de gemeente Dèventer, want eerst wier Diepenveen deur Dèventer – volmaakt onneudig – opeslokt en döörnoa Battum oke nog ens. Haal uut oew winst!
As Crödde in zien Peugeot 307 stapt, hef e nog net een kieksken op de nieje weg diee een stuksken langes het kanaal löp bie de Cröddenbrugge. Diee weg mot het autoverkeer vanuut Roalte langes de N 348 nöör Zutphen en Apeldoorn um Dèventer hen leiden. Het is een moatig drukke weg, ‘Sint Joris’ hef ter gin last van.
Crödde stelt zien ‘Tante Truus’, zoo neumt e zien Garmin-navigatie-systeempjen, nieet in, hee kent immers de weg as zien brookzak. Oaver de Cröddendiek met hier en döör verkeersremmende drempels en een maximum toeloatböre snelheid van dertig kilometer per uur rit hee deur Schallekbattum langes het olde gemeentehuus nöör de Roalterweg. Oaver de Roalterweg geet het nöör de Wechelerweg, veur hem nog steeds het ‘Drieekwärtierslaantjen’. De Wechelerweg hef noe een maximum snelheid van zestig kilometer per uur. Op de hook van de Roalterweg passeert e het ‘Crematorium’ van Diepenveen, wat noe oke al weer wat jören in gebruuk is. Gelukkig is heezelluf tot noe altied rechtstandig ter nöör binnen egoan en der oke zoo weer uutekommen. An het ende van de Cröddendiek op de krusing met de Konegin Willeminalane is e de eerste rotonde epasseerd. An het ende van de Wechelerweg kump e bie de tweeden; dat is op de krusing met de Boxbergerweg. Hee rit noe oaver de ‘Vossenbelt’ nöör een ronde krusing met de Gewestlaan en slöt deur op de dertig-kilometer-weg linksof. Dan rit hee deur töt an de Oranjelaan: rechtsof. Dan zut e links ‘Expert’ liggen, wöör in een nogal ver verlejen de zelfbedieenings-krudenierswinkel van Rinus en Diny ten Kleij evestigd was. Het annemmersbedrief van Bijsterbosch, links verderop is oke al lange verdwenen, der stoat noe prachtige woonhuzen. Èven verder kump e langes het leuke hobbyzaakjen ‘Passe-Partout’. Döör wordt veur dames oke vake demonstraties egeven op verschillende gebieeden: kaerten maken, borduren en andere handwerken. Creatievelingen könt ter hun geestdrift bevredigen töt en met. Butendat bieedt de winkel postfaciliteiten en kui’j der Ing-bankzaken töt op zekere heugte regelen. En dan de soorten prentebrieefkaerten diee der te koop bint. Crödde kump ter vake, wiel hee zien teksten der löt kopiëren, want ter steet een modern copieerappäraat! En het is ter nieet duur!
Op de hook van de Dreiumsweg en de Oranjelaan en Dorpsstroate komt oke nieje zaakjes, hef hee eheurd: een blomenzaak in de olde zaak van Hoetink, een meubelzaak wöör makelaer Vrielink ezèten hef. Ofwachten möör. Van Ginkel, gespecialiseerd op hengelsportgebieed, is ter nog steeds en Keurslager Harmsen oke. Wat noast Harmsen kump, is nog nieet officieel bekend, möör meugelijk een èèthuusken. In de olde schonenwinkel van Pas zit noe al jören een ‘Mediepost’ van de ‘Kringapotheek Borgele’. Dat is fantastisch veur de Diepenveense bevolking! Al jören meugt de huusärtsen van Diepenveen al gin eigen apotheek meer holden. Tegenoaver Kemper zit een AH-zaak en noast Kemper hef Bakker Van Rijssen uut Wesepe een filiaal. Diepenveen hef dus weer een wärreme bakker! Zoo, hee is bie Kemper!
Rutger nemt de auto in ontvangst en wil hem nöör ‘huus’ riejen. Crödde weigert! Hee geet een ende wandelen.