88 Zoaterdag, 1 februäri 2014 - Strèèktaalgroep ... 'Beatrix met Hart en Ziel"... Slot
Um tien uur is de koffie ineschonken. Peter Dullaert hef lieeveder een köpken thee. Hee is ter um ons te vertellen oaver de ontwikkeling van de godsdienst in Dèventer en Salland vanof de Middeleeuwen. Hee dut dat in een Nedersaksisch wat een mengsel is van Zutphens, uut Zutphen, wöör Peter vrogger ewoond hef, Duutsachtige klanken, zien grootmoder kwam uut de buurte van Emmerik en Achterhooks. Volgens Willy Hoogstraten pröt hee ABN, Algemeen beschaafd Nedersaksisch. En zien dialect klinkt oke heel erg mooi. Allewel e zien tekst helemoale uuteschreven hef, les hee diee nieet veur as een schoolmeester, nee, hee zit as het wäre midden tussen ons en dus is iederene heel goed bie de les. Hee teunt nog ens weer watveur gemeenschapsmens e is. Dat menselijke in proaten, handelen en doon, zit bliekböör in de Dullaerts: zien tweelinbreur Ricus is missionäris in Zuud-Afrika en dus oke veurtdurend dieenend bezig, de jongere breur Marc Dullaert is “Kinderombudsman” en steet pal veur de rechten van de jeugd.
Het wördt een prachtige ochtend, wöörin het buten kold is, möör binnen de wärremte heerst en de zunne schient. En wiej meugt allemoale meeproaten. En döör wördt dapper gebruukt van emaakt! Ikzelluf hebbe deur diee mooie märgen een prachtige zoaterdag.
Ik hebbe vanoavend gin zin nöör “Beatrix met Hart en Ziel” te kieken Zon in mekäre edreid programma wil ik nieet zieen. Ik goa lieeveder nog ens wat krabbeltjes oaver haer maken. En meschiens is het de invlood van gedichtendag, möör der ontsteet spontoan een versken op slagriem, meschiens wiel Beatrix veur mien altied een roadselachtige figuur ebleven is, meschiens kump dat deur haer stärre volle kapsel en haer vake bevroren glimlach. Veur mien is zee altied een soort dierböre stripfiguur ewest, wöör ik slechts in de standaerdtaal oaver dichten kan.
Mevrouw X
Veel groter nog dan Obelix
En machtiger dan Asterix
Verstandiger dan Idéfix
Is onze Prinses Beatrix
Als vorstin stond ze op de rix
Haar waarde was een hele mix
Miljoenen en dat was niet nix
Bestieren deed zij fel en fix
Bij hockey maakte zij nooit stix!?
Voor haar zijn steeds de hoogste prix!?
En … heeft zij nog een appendix?
Of ontnam men haar dit klein affix
Gedraagt zij zich nog als rectrix?
Eigenlijk weet ik nix van onze Trix
En hiermee beslute ik “Koninkrijk Konkelfoes”, deel 3. Ik hebbe der genog van konkelfoezers en nieet konkelfoezers te blieven volgen. Ik goa bezig met “Bijzondere dingen” – “Literatuur”. … Juliana, Beatrix, Willem-Alexander, Maxima, bedankt. “Aan jullie ligt het niet dat “Koninkrijk Konkelfoes” hier stopt!”.
------ Gerrit Kuijk – Sprokkelmaand 2014
