86 Donderdag, 30 januäri 2014 - Sprèèkwoorden en gezegden met getallen
Gisteroavend zit ik veur de teevee en ik ziee bie “Nieuwsuur” hoe of onze Staatssecretäris van Financiën, Weekers, zieneigen mot verantwoorden oaver het feit dat een boel zörgtoolagen nieet op tied of egeenieet uutbetaald bint, umdat de begunstigden hun rèkeningnummer nieet of nieet op tied zollen hebben deuregeven. Hee steet te ‘stuntelen’ en ‘Hee löp in zeuven sloten tegelieke’ en ik denke: ‘Iej kunt bèteder de handdook in de ring gooien en oftreden, wan dit wördt nooit wat’.
A’k nöör bedde goa um ellef uur is het kamerdebat altied nog an de gang en ik wille de ofloop toch wel graag weten. En as ik um ongeveer hallef twalef de koptelefoon van mien wekkerradio opzette, Ali slöp al, heur ik de stemme van Weekers, diee meedeelt dat e ‘mergen’ nöör de Keuning geet um zien ontslag an te bieejen. Verstandige keerl! Hee is bliekböör zoo ‘Op zien ellef en dertigst’ bezig ewest met diee materie, dat e helemoale achterop eraakt is en dat nemt diee jonges en meiden in het pärlement nieet.
Noe mot ik wel uutkieken met diee uutdrukking ‘Op zien ellef en dertigst’. Der bint een boel mensen diee denkt dat het gezegde kump van de räre, slome wieze wöörop bestuursangelègenheden deur de ellef steden en dertig grieteniejen in Friesland ofedoan wieren. Nee, het lig wat zuverder. Langzaam of sloom is nieet het juuste begrip! Het oaverleg en de besluutvorming gebeurden ‘netjes’ en ‘Zooas het heurt’, dus heel precies en nauwkeurig! Ik pakke mien olde “Stoett” ter möör ens effekes bie. Op pagina 84 en 85 lèze ik dat vrogger onder een “ellef en dertig” verstoan wier een kamme wöördeur 4100 droajen of 41 gangen eschoaven worden konden: 41 = 11 + 30(Ku). Zon kamme is ene van de fiensten diee der besteet en zeker de breejsten. Dööran kon ‘Op zien ellef en dertigst’ de betèkenis ontlenen van ‘op fiene, uutnemmende wieze, uutstèkend, keurig, netjes, en langzaam , want zon fien wèèfsel hef een boel tied neudig. Zoo bekeken nemt de heer Weekers ontslag, umdat e zien werk völs te goed wol doon. En umdat het vannacht evroren hef: Hee is nooit oaver ene nacht ies egoan!
Dit is trouwens pas de tweede keer dat de heer Weekers in meujlijkheden is ewest. Möör ’Alle goeie dinger bestoat uut driee’. Hee had ter goed anedoan dieepe het heufd te bugen en de derde keer of te wachten! Meschiens was e dan diee eigenzinnige meestens heel domme kamerleden de baas ewest. Butendat: ‘Driee keer is scheepsrecht en de vierden veur de knecht’. En meschiens was hee dan wel de knecht ewest diee een motie van wantrouwen dan nog oaverlèèfd had! ‘Minister’ beduujt immers ‘dieenaer’ (‘Knecht’).
Weekers wilden ‘Een mijl op zeuven’ goan en zoo nieet in een ‘financieel moeras’ terechte kommen en ‘ondergoan’. Iederene weet immers dat wiee vrogger rechtstreeks van Meyel nöör Sevenum liep, in de Peel dreigden te verzoepen en da’j dus een grote umweg mosten maken. Diee umweg was Weekers bezig te nemmen!
Ik denke trouwens dat ter van mensen zooas Mijnheer Weekers gin ‘Dertiene in een deuzien’ goat. Van zien soort goat ter möör ‘Ellef in een deuzien’. Diee laatste uutdrukking vond ik eigens uut, toen mien vader oaverleed! Oke mien vader was net as Weekers een uutzonderlijk mense: Hee verkocht as handelsreiziger bieveurbeeld wolle. Hee wol een klante gin gros (144) knotten verkopen, möör slechts een deuzien (12). De klante verkocht ter möör ellef van. Ik zei toen: “Ellef van het deuzien, joa, zoo völle goat ter oke van Vader in”, um an te dujen watveur een uutzonderlijke figuur mien vader is.
Ik zegge tegen Weekers: “Van oew baas en de andere smakkers in het landsbestuur goat ter dertien in een deuzien, van oew soort möör ellef!”
Iej nammen op de 29-sten oew besluut: 29 = 13 + 11 + 5, een symbool dus: “Het was veur Mijnheer een ongelukkige (13), gekke (11) dag. Geef mien de vieve (5), makker!”