75 Dinsdag, 31 december 2013 - "Zalig uutende...!"
Um kwärt oaver zeuven slöt de radiowekker an. Ik schrikke wakker en ik mot èven biekommen. Dan trek ik het licht an. Ali lig nog lekker noast mien te sloapen. Ik loate haer lekker in dreumenland en stoa op. Ik hebbe vandage een heleboel kleine dinger te doon. Diee bint allemoale ericht op disse dag en diee van märgen. Ik nemme mien medicienen tegen mien te hoge blooddruk in, schere mien, elektrisch vandage de dag, wasse mien bie de wastoafel en kleje mien an. Um hallef achte hale ik de krante uut de brieevenbusse en ik lèze de rouwadvertenties. Dan make ik veur Ali en mien een brooträmmeken klöör, veur beiden met pindakeze, en veur Ali koake ik der nog een eiken van David bie, David van Zijl is onze ‘Kaasbaas’ en eierboer. A’k klöör binne, kiek ik of Ali al wakker is, möör dat is nieet het geval. Ik loate haer sloapen en ète mien brood en ik drinke der een glas thee bie. Dan schelle ik de eerpels veur vanmiddag en goa een fiene verse worst broajen. Tegen de tied da’k döörmee klöör binne, is het negen uur. Ali slöp nog steeds, möör ik make haer noe toch effekes wakker um te vertellen da’k boodschappen veur vandage en märgen doon goa. “Ik kom der zo uit”, zeg zee, möör ik zegge dat ze rustig blieven liggen kan en da’k mien wel redde. Dan trek ik mien jasse an, doo een dasse umme, ik goa de deure an de Grutterinkstroate uut, stappe in de auto en rieje nöör Härmsen, de “Keurslager”.
Um kwärt oaver negene pärkeer ik bie Härmsen veur de deure. A’k uutstappe en nöör de winkeldeure lope, geet diee net lös. Een goeie bekenden van mien kump de winkel uut. “Zalig uutende”, zegge wiej gelieke. Hee dut metene zien täsken lös, teunt mien de lekkere häpkes diee hee ekocht hef. “Dat was ik oke van plan”, lache ik. Dan goa’k nöör binnen. Een man of viere stoat ter in de zaak. Ik binne dalijk an de beurte. Ik bestelle twee keer vieve ebroajen bällekes gehakt, ene keer in ketjapsaus en de andere keer ‘natuurlijk’. Verder nem ik twee feine rookworsten, want märn komt Anneke en Gerrit uut Aduärd bie ons en diee maak ik boerenkool deur mekäre en döörumme koop ik tèvens magere spekskes. Tegen de klanten roop ik: “Zalig uutende!”. En een nog tamelijk jonge keerl dreit zieneigen nöör mien umme en vrög: “Zalig, wat betekent dat eigenlijk?”- “Zalig is ‘lekker’, ’t is bieveurbeeld het geveul wa’j kriegt a’j met oew partner likt te vriejen!” Dit antwoord völt mien zoomöör in. Diee jongeman schut in een härtelijke lach en slept döörin de andere klanten mee.
Ik rèkene of, oftewel ik pinne. Ik vroage de winkeljuffrouw of ik honderd euro te völle pinnen mag, want ik hebbe ontdekt da’k nauwelijks nog geld in de knippe hebbe. “Graag”, zeg zee. Ik snappe wel wöörumme. Het is veur zon drukke zaak minder gevöörlijk geld op de banke te hebben as in de winkellaa.
Noe riej ik nöör ‘Appie’. Eerpels he’k neudig en een boel lekkere dinger veur vanoavend um het uutende veur mien en mien Ali nog zaliger te maken. Knakwörskes heurt terbie, kleine sloatjes, wat sausjes, vla, pudding, chocolademellek en neumt möör op. In ene van de lekkersgangen steet een jonge mevrouw bie de wiensoorten. Zee hef een flesse rooie wien in de hand en zee bestudeert andachtig het etiket. “Ik ziee zoo dat dit goeie wien is!” roop ik. Zee kik op met een blik van herkenning. “U shopt ook ver van huis! U bent ver van Colmschate” – “Dat is mijn broer; we lijken precies op elkaar, als we tenminste niet bij elkaar in de buurt zijn”, zeg ik. Zee blik een medewerkster te wèèn van de huusärtsengroep in Collemskoate. Ik nemme mien veur mien oldere breur deroaver op te bellen. Zeldzaam toch zon ontmoeting. Ook haer wens ik een “Zalig uutende!”.
Tegen kwärt veur tiene bi’k weer thuus. Ali kump net onder de douche vandan. Tien minuten later zitte wiej an de koffie. Wiej hebt ter een wärreme öliebolle bie. Ik heb ter twintig ekocht veur de winkel van ‘Appie’. De ponyclub verköch ze döör vandage. Ik heffe de bolle, nem een hap, zegge tegen de hele wereld härdop “Zalig uutende!” en denke: ‘Wat he’k ’t toch good!’
