71 Vriedag, 29 november 2013 - Knappe Koppen
Een lèzing meemaken zooas gisteroavend op onze Soos gebeurt nieet vake. Wiej zit allemoale stille te luusteren nöör Doctor Laurens Jan Jellema. Hee hef het met ons oaver “Nieuwe analysetechnieken in de geneeskunde. (Lab. On a chip/nanotechnologie). Hee nemt ons letterlijk mee in de microwereld van de geneeskunde. Hee teunt ons met woord en beeld “zien” laboratorium en steet veur de pauze stille bie technieken van ‘scheiden’ za’k möör zeggen, wöörbie alle vochtbestanddelen in onze bloodsumloop emèten worden kunt um een goeie diagnose te kunnen stellen. Hee löt zieen hoe of de klinisch scheikundige en de medisch specialist samenwerkt op dit gebied. Noa de pauze teunt e ons de verschillende minimèètinstrumenten, diee de ärtsen in stoat stelt stantepede mètingen te verrichten! Knap! De meesten onder zien geheur hebt diee ingewikkelde materie goed volgen kunnen, wat wel blik uut de vroagen diee deur zien inleiding opewörpen wordt.
Ik heb het kunnen volgen, umdat ik op de HBS lange elejen het begrip elektrolyse heb leren kennen en ik herkenne in de beelden van de chips hoe of diee techniek bie de nano- en micro-mètingen gebruukt wördt. Möör … der bint een boel dinger diee mien verre boaven de pette goat!
Noe denk ik noa oaver knappe koppen diee ik in mien lèven heb meugen zieen greujen. Dat is met de zönne van Gonnie en Harco Jellema nieet het geval, möör dat vermindert mien bewondering op gin enkele wieze. Wiee ik perseunlijk heb meugen meemaken en wöörvan ik al heel vrog constateerden dat het hem nieet schemerden, is Jeroen Smit. Zien olders bint trouwens oke beiden zeer begaafd. Het is meschiens heel vremd, möör iedere keer as ik de scherpzinnige hoogleraer Jeroen veur de televisie ziee en luustere nöör zien messcherpe analyses op veurnamelijk economisch gebied, veul ik een zekere trots dat ik hem in zien jeugd heb leren kennen en een stuksken van zien greuj nöör de volwassenheid heb meugen meemaken! Möör wiee völle meer bie-edragen hef töt de wasdom van Jeroen is de heer Kijlstra van de vroggere Alexander Hegiusscholengemeenschap in Dèventer, docent economie. Ik denke dat diee der een boel too bie-edragen hef dat Jeroen bedriefskunde en sociologie is goan studeren! Wat bin ik toch een klein menneken bie disse keerl vergeleken! Zon jonge höldt een mense heel bescheiden.
En dan is döör nog mien jongste breur, Käreltjen, Doctor Karel Elbert Kuijk, diee op het ‘natlab’ van Philips de ene noa de andere uutvinding edoan hef en döörveur heel hoge ‘Koninklijk’ onderscheiden is. Hem heb ik echt meugen begeleiden en hee hef mien ens bekend dat het veur een deel “an mien breur Gerrit” te danken is dat e uutvinder op elctronisch terrein eworden is. Hee is inmiddels al drieeënzeuventig en de oldsten van de knappe koppen diee mien te binnen eschoaten bint.
Wat hef een mense der feitelijk an oaver zukke dinger as geleerdheid, intelligentie, uutvindingen en zoo noa te denken? Mien dut het mien kleinheid veulen en dat is veur mien heel veurnaam! Butendat stel ik väste dat iedere volgende generatie veurtbouwt op de verwörvenheden van de veurige: Eerst kump ‘de ontogenese is de recapitulatie van de filogenese’ in zeer korte tied van het lèven en dan brengt diee knappe koppen de mensheid weer een endjen verder. Tenminsten, zoo denke ik teroaver. Möör ik realisere mien dat dit nieet enkeld geldt veur de zeer intelligente mensen! Iederene bouwt veurt an zien ontwikkeling als enkeling noa de herhaling van zien ontwikkeling as soort! Het drieetal knappe koppen dat mien an het denken ezet hef, stek ter natuurlijk boavenuut. Zee bint “überhaupt” knap. Möör feitelijk binnen wiej het allemoale as normale mensen: Knappe Koppen! Ieder kan op zien eigen terrein een oas wèèn! Ik mot ter möör ens oaver schrieven.
