68 Zundag, 24 november 2013 - Nieje wègen ...

> Categorie: KONINKRIJK KONKELFOES 3 Gepubliceerd: maandag 25 november 2013


Vandage goa we met de auto nöör Dinxperlo, de verjöördag vieren van onze jongste kleinzönne. Gisteroavend belt mien zönne ons op: “Pa, ik wil je morgen wel komen halen met Ma en dan breng ik je aan het eind van de dag ook wel terug. Kleine moeite”. – Al bin ik zesentachtig, veur mien is het een kleine meujte diee zestig kilometer nöör Dinxperlo te riejen en weerumme en oke in het donker, dus ik zegge: “Jonge, wat lieef um dat te willen doon, möör ik rieje graag zelluf nog… “. – “Je moet het zelf beoordelen”, krieg ik as antwoord.

Tegen vief veur ellef lope wiej nöör de wagen, Ali achter de rollator, want diee nemme wiej toch möör mee, want meschiens goa we met onze schoondochter, zönne en kleinzönne wel een endjen kuieren; dan is het makkelijk veur Ali um met ons mee te kommen.

Ik zette de navigator met Tante Truus terin op zien plaatse en zeuke onder haer favorieten mien zönne op. Der is eerst effekes wat miswiezing, möör dan geet Tante an het rèkenen an en vervolgens hoof ik de auto op de weg op de kaerte en de heldere stemme van Tante Truus enkeld möör te volgen. Het is wel mooi da’k dat dink hebbe, want ter bint iedere keer weer verrassingen.

Toen ik zon hallef jöör elejen oke nöör Dinxperlo mosse, had ik deur Kemper net de kaerten van de Benelux in mien navigator loaten verniejen. En dat was möör goed oke, want bie Eefde was de rondweg klöör en ik hoofden nieet te zeuken. En dat is mooi veur zon olde knapperd as ikke: nieje wègen bewandelen zonder da’j ze zelluf hooft te zeuken. Tante Truus nemp mien an het händjen mee. “I never walk alone”.

An de verkeerssituatie in Eefde hef diee nieje weg een boel goeds bie-edragen: de stank van de brandstof van het deurgoande verkeer is noagenog verdwenen, de verkeersgevören, veural veur kinder, bint anmerkelelijk ofenommen en de inwoners van het dorp kunt zich gemakkelijker en rustiger deur hun woonumgèving bewègen. Het hef jören eduurd veur de umlegging van de N 348 döör een feit was, möör het is gelukt!

Wiej riejt noe vlot tussen Zutphen en Warnsveld deur nöör Baak, Toldiek en Hummelo en döör mot ik …. een nieje weg ‘bewandelen’, wöörbie Tante mien nieet begeleiden kan. Der is bie Hummelo pas een nieje rotonde in gebruuk enommen en diee is nieet op de kaerte verwerkt. “Herberekenen…, herberekenen…”, rup Tante Truus, möör ik ziee op het schermken onze auto in het niemandsland riejen. Ik kieke metene op de borden en ik kieze de richting Doetinchem. Disse weg blik um Hummelo hen te lopen en èven later komme wiej bie een rotonde wöörop ik rechtsof mot sloan. Ik herkenne diee weg metene en Tante Truus bliekböör oke, want zee zeg: “Over één komma één kilometer rotonde oprijden”. En ik wete dadde wiej op weg bint nöör Langerak en Doetinchem.

Onze reis verlöp veurspoedig en um precies vief oaver twalef binne wiej in Dinxperlo. Wiej wordt härtstikke enthousiast ontvangen en onze kleinzönne is heel bliej met het beuksken oaver “Mees Kaas”. Hee is noe zesse en hee kan de meeste éénlettergrepige woorden al heel goed lèzen. Hee les ons dalijk een stuksken veur.

Ik zegge tegen mien zönne hoe bliej of ik ben dadde wiej zukke lieeve kinder hebt, diee ons oaveral brengen wilt. Möör ik onderstrepe nog ens dat ik zelluf völs te graag rieje en dat een mense op mien lèèftied zukke dinger ook bie mot holden. En ik zegge dat ik vandage der nog ens weer bie bepoald binne dat ik letterlijk en figuurlijk zoo ook edwongen blieve “naar nieuwe wegen te zoeken”, wöördeur ik “lèvendig” blieve en mien brein in bewèging holle. Henk is het döör volmundig mee ens, zien vrouwe Alma trouwens oke. En mien kleinzönne: hee spölt een kompjoeterspelleken, wöörbie zien ooghandcoördinatie zoodoanig wordt e-oefend dat nieje wègen zeuken töt zien hele wèzen geet beheuren. Oh joa, Diepenveen – Dinxperlo is nog steeds 61,8 kilometer met de auto. Dat heb ik oke nog èven mee-ekregen.                

 

Wij gebruiken één cookie, die essentieel is voor het functioneren van deze website. Lees meer: Privacy & cookies.

  Ik accepteer deze cookie.
EU Cookie Directive plugin by www.channeldigital.co.uk