51 Moandag, 7 oktober 2013 - Twee wärreme douches ...!
Vandage stoa ik nieet zoo vrog op. De beide veurige dagen heb ik nog in de benen. Ik bin nieet van plan dus um völle te ondernemmen. Beheufte heb ik an rust en een beetjen bezinning. Ik zitte noa de märgenbrootram wel achter het scherm, möör ik rake de toetsen nauwelijks an. Ik denke weerumme an zoaterdag. Um precies hallef tiene tuft Ali en ik nöör Miny Stegeman an de Doffegnieslaan. Haer hale wiej altied op azze wiej nöör de samenkomst van onze Strèèktaalgroep goat. A’k bie haer veur rieje kump ze de deure al uut. Um tien oaver hallef tiene stoa we veur “De Notenhof”. De heer Pols, administrateur van de PKN in Diepenveen kump dan net met zien Peugeot anriejen. Hee löt de dames binnen, onderwiel ik mien auto op het Kerkplein stalle. Döör ziee ik net mien vrind Arie Hofstede uutstappen: hee hef disse keer de leiding oaver het geheel. Wiej loopt samen nöör de Dorpsstroate. Döör hef Albert Bartelds, strèèktaalconsulent van de “IJsselacademie” net zien auto estald um zien spullekes uut te pakken. Hee zal vandage in twee keer driee kwärtier ons loaten meelèven met het wel en wee van zien werk.
Wiej bint met zien vieftienen. Albert veult metene an dat het een gezellig stelleken is. Noa de beginkoffie vertelt e honderd uut oaver de academie en wat hee döör dut. Feitelijk is e muzikant, zeg e, dus strèèktaalmuziek hef zien grote andacht. Möör ook de andere kanten: umgoan in taal met demente mensen, bejöörde zieeken, in de schole met jonge en oldere kinder en goat zoo möör deur, hef zien grote belangstelling. Cursussen leiden en opzetten in dit verband dut e völle met grote inzet. Hee vertelt tèvens in dit verband oaver zien collega, Philomène Bloemhof. Hee dut met ons een muziekkwis, ellef strèèktalen onderscheiden, wöör ik niks van make. Ineke Leeftink en Ed Lammers goat beiden met de hoofdpries strieken; vieve goed! Ärie les tenslotte nog een mooi verhaal in zien Veluws veur: “Tante Froufrou”.
Het is een prachtige möör vermeujende märn. Ik lope noe alles nog ens rustig noa.
En dan de zundag. Ali en ik wordt um tien uur opehaald, noe veur een hele dag ‘strèèkcultuur’: Wiej wordt deur Henk, onze tweede zönne, nöör het “Openluchtmuseum” in Ärnhem erejen. Alma, zien vrouwe, en Lucas, zien zönne van bienoa zesse, bint oke mee. Wiej hebt een makkelijke rolstool. Diee kui’j opvollen en in de kofferbak leggen. Iej kunt hem as rollator gebruken en hee is veerkeslicht. Ali hef gin enkel bezwöör döörin erejen te worden! Azze wiej an de kassa kaertjes koopt, bliek ik, as douwer van de rolstool, as begeleider van een invalide beschouwd te worden en dus … kom ik ter gratis in. “Een wärreme douche veur het “Openluchtmuseum””, zeg ik in mieneigen.
Wiej wandelt de rolstoolroute. En dat is een feest. Wiej kunt hoaste oaveral bie en in kommen, want het grote park is rolstoolvrindelijk. Lucas ziee ik genieeten en hee begrip alles wat oaver värkens, kooien, spinnen, weven, touw dreien in de touwslagerieje, malen enzoovoorts verteld wördt. En natuurlijk wil e graag een ritjen met de Rotterdamse Tram maken. Henk en ik goat ons veurstellen dat Gerard Cox, Jaap Kooiman, de tram bestuurt, möör wiej kunt toch nieet op zien achtername ‘Kooiman’ kommen. Diee neumt Henk pas, azze wiej al lang en breed weer op weg nöör huus bint.
Thuus ekommen bel ik dalijk “De Zomertuin” an de Platvoet, want wiej wilt döör noa vief uur wokken. Um kwärt oaver vieve binne wiej döör. De ‘Chinees’ ontvangt ons as altied heel vrindelijk. Ik wete dat Lucas völle lieeveder patat was goan èten, dus ik zegge tegen de bedieening: “Deze jongeman houdt heel veel van patat”. Nog gin tien minuten later kump een ober met een rechthokig bord patat met zakjes mayonaise bie ons an toafel. Lucas glundert! Dus oke veur ‘De Chinees’ “De Zomertuin” in Dèventer een wärreme douche!
Joa, noe kiek ik terugge op een prachtige zundag. En butendat kon ik oke nog twee wärreme douches uutdelen!
