50 Vriedag, 4 oktober 2013 - Dierendag ... . Lekkere dieren!
As ik vanuut mien werkkamer deur het raam op de Grutterinkstroate kieke, ziee ik vanmärn Boris, de rooie kater, nieet op de mooie rooie motorkappe van Joop zien auto liggen. Dat wil dus zeggen dat Joop nog nieet met zien wagen weg ewest is, want de motor gef gin wärremte.
Ali en ik, en ook onze kinder, bint altied gek op katten ewest. Jören elejen, an de Lambertus van Bommelweg, hadden wiej der twee: Napoleon en Eigenwijs. Napoleon ging op twalefjörige lèèftied dood, Eigenwijs mocht achttiene worden. Diee hebbe wiej bie de dierenärts loaten insloapen. Noe hebbe wiej al jören gin huuskatten meer. An de ene kante vinde wiej dat wel jammer, möör an de andere kante, wiej hebt al genog an mekäre en der nog ens uutgoan wille wiej oke nog wel ens en döördeur zollen zellufs pärkietjes bie ons tekort kommen. En dat hebbe wiej wel van de politica Marian Thieme eleerd, dat dieren der nieet bie in mot schieeten. Zee kan soms diee dinger zoo mooi zeggen, net as diee Romeinse senator of zoo in de olde tied: “En voorts ben ik van mening dat Carthago verwoest moet worden …!” Marian Thieme: “En voorts zijn wij van mening dat nertsenfokkerij uit den Boze is .” De laatste zinne schut mien noe spontoan te binnen.
Boris van oaverbuurman Joop hef hele scherpe nègels. As e op de motorkappe zien peutjes zit te likken, kui’j ze nieet zieen: ze bint inetrokken. Ze doot mien an een veuranstoande politieke figuur, Jan Nagel, denken, wöör een heleboel scherpte, venienige scherpte anzit. En hee dut mien dan weer an de nieje politicus denken, diee deur hem op het schild eheven is, Henk Krol. En van hem dut de achtername mien weer denken an een kater diee nog nieet ekastreerd is. Ik neume hem wel ens een keertjen gekscherend ‘krolse Henkie’, wat pas enige betekenis kreeg, toen e met de olde dames van het vroggere “Sweet Sixteen” zong “En dat is Henkie …”. En zoo ontdek ik vandage weer dat mensen ook möör dieren bint!
Henk kump vandage weer volop in het niejs: As eigenaer en uutgever van de ‘Gay Krant’, het vrolijke, wilde, lösbandige, op homo’s erichte ‘viegeblad’, is e zoo stom ewest de pensioenpremies van zien ärbeiders nieet an de oaverheid of te dragen. En dat neumen wiej in ons land “fraude plegen”. Möör dat nieet enkeld, zien mensen mochten döör nieet oaver proaten; zoo maakten hee ze dus … medeplichtig.
Gin mense is van dit alles op de heugte buten Henk en zien staf. As Henkie met zien ‘Gay Krant’ bankroot is, hef hee “Geen nagel meer om zijn gat te krabben”. Möör diee ‘Nagel’ kump! Jan zörgt dat de olderen een ‘50+’-pärtieje kriegt met Henkie Krol as veurman! Henk kump op veur de olderen en veur behold van hun volle pensioen en gin mense weet… . Töt zien olde getrouwe medewerkers de bek oapenebroaken wordt. Henkie zit plotseling op een glierbane, heur ik noe op de radio. Hee gliert zoo de ofgrond in. Onder het glieren springt e van de vieftigplusslee. Diee glit langes het pensioengat en Henkie völt in de koele diee e eigens egraven hef. “Dag Henkie”, zeg ik fluusterend, “Oe ziee we nooit meer weerumme”.
‘Een lekker dier bi’j toch, Henkie. Iej wiekt nieet enkeld of van de geslachtelijke norm, wat op zichzelluf nieet zoo heel biezunder is, möör da’j ofwiekt van de geestelijke menselijke norm, nem ik oe kwoalijk. As politicus mo’j onkreukböör wèèn. Dat onderscheidt oe noe juust van de dieren. Diee meugt handelen nöör hun instincten, want zee kunt nieet anders, möör iej hebt toch oew verstand nieet veur niks ekregen’. Dat denk ik allemoale … en nog völle meer.
Ik hoape dat ik Jan Nagel nog ens sprèke oaver zien zoovölste blunder in zien politieke lèven! Oke zon lekker dier! Ik hoape dat Marian Thieme te pas of te onpas nog ens an het ende van een spietsjen in de Tweede Kamer zeg: “En overigens zijn wij van mening dat Henk Krol(s) en Jan Nagel als ‘lekkere dieren’ niet meer mogen meespelen op het politieke veld…”.
Lekkere dieren in de politiek, der schieet ter mien een hele rieje te binnen. Al het dierlijke is hun eigen, al het menselijke is hun vremd. In gedachten neum ik ze op. Ik komme töt ruum zestig procent van de Tweede Kamerleden. Ze zit in alle groeperingen… . “Bah, bah, baaah!”
