49 Zundag, 29 september 2013 - "Viering van onze verjöördagen..., gezellig!"

> Categorie: KONINKRIJK KONKELFOES 3 Gepubliceerd: maandag 07 oktober 2013

 

Um kwärt veur ellef zitte wiej in de auto: um ellef uur modde wiej an de Zwolseweg wèèn um Ali haer breur op te halen, diee hef gin eigen auto. Azze wiej um vief veur ellef bie zien huusken komt, ziee ik hem al stoan. Hee is net as mien een man van de klokke. Wiej riejt rustig deur de binnenstad, oaver de Handelskade, langes de Meester de Boerlaan, oaver de weg langes ‘De Boreel’ nöör Twello, oaver de Wilhelminabrugge. Bie “Korderijnk” steet de jonge uutbater, Rogier, ons al op te wachten. Hee gef an dadde wiej op hun eigen plas an de achterkante pärkeren kunt, want ons feest vindt in de zaal an diee kante plaats.

Het is prachtig weer en het beloaft een mooie dag te worden. Dadde wiej dit belèven meugt: samen honderd negenenzestig, wöörvan ik zesentachtig! En alle breurs, zuster, zwoagers en schoonzusters lèèft nog, op ene noa, mien oldste breur Cor, diee is een jöör of achte weerumme oaverlejen. Met achtendertig noaste familieleden, kinder en kleinkinder met anhang inbegrepen, vieren wiej onze verjöördagen op disse zunnige zundag.

Onze zaal is prachtig inericht, gezellig met grote ronde toafels en makkelijke stolen der um hen. Rogier wis ons wöör of straks het brunchbuffet kump te stoan en wöör Ali en ik het makkelijkst kunt goan zitten. Ik betrappe mien der op as ik zitten goa, dat ik tevrèden rondkieke, want ik heb een gelukkig en voldoan geveul.

Tegen hallef twalef streumt onze gasten binnen. Twee vrindelijke jonge dieensters leidt hun binnen en umdat de ‘Sprinter’ uut Dèventer prachtig op tied um hallef twalef binnen is ekommen, bint oke onze kleinkinderen-studenten uut Grönningen mooi op tied. En diee studenten zörgt veur een verrassing, tenminste ene: zee is toch ekommen, allewel zee märn of oavermärn een zwöör tentamen doon mot. Het ontroert mien: onze verjöördagen vindt zee toch veurnamer. Ik kriege de troanen dervan in de ogen.

Met negenendertig binne wiej dus. “Wat een schäre!” zol mien moder zeggen. Onder de koffie met gebak, onderwiel wiej alle prachtige kado’s uutpakt, kiek ik de schäre rond. Ik ziee enkeld blieje gezichten. Lieeveder hadden Ali en ik disse mensen in ons eigen huus ehad, möör in “De Pellerije” könne wiej ze nieet herbergen en wat de verzörging betreft kunne wiej het zeker nieet meer an. Möör Rogier hef disse zaal zoo an-ekleejd dat diee een sfeer van een grote huuskamer oademt. ‘Bravo Rogier en medewerkers en –werksters’, denke ik hoaste härdop.

Het wördt een geweldig feest. Gelukkig bint onze gasten nieet an hun stolen väste-eklonken en zee bewèègt huneigen as echte ‘kukens’ al kakelend deur de ruumte. De jongste gasten, mien kleinzönne van vieve en mien kleindochter van achte genieet van hun eigen feestmenu met patat en frikandellen. De anderen doot zich tegoed an de soep, de sloatjes, de vleissoorten, allerhande typen breudjes, zeute sjem en zolte keze. Oke de lekkere toetjes goat ter grif in. De gezelligheid kent ook hier gin tied. En veur wiej het weet, is het allemoale alweer veurbie.

Dan goa ik ofrèkenen met Rogier en ik kan nieet anders as de hulpe van de bedieening en de kwaliteit van het geboadene reumen. Breed lachend nemt hee mien komplementen in ontvangst en samen hoape wiej dat oke het ankommend jöör ons de gezondheid nieet in de steek löt! Per slot van rèkening bint tèvens Ali en ikke mensen van de dag.

De kinder helpt ons inpakken. Wiej nemt ofscheid van onze familieleden, wiej wandelt nöör de pärkeerplaatse, wöör ene van de bedieenende meikes ons nog op tied bereikt um ons een vergèten boeket an te reiken.

Dan rieje wiej samen met mien zwoager op huus an. Ik veule mien gelukkig en as ik opzied kieke, ziee ik dat Ali haereigen mee zoo veult. “Wat lach je?” vrög ze dan. Ik antwoordde: “Viering van onze verjöördagen …, gezellig!”    

 

Wij gebruiken één cookie, die essentieel is voor het functioneren van deze website. Lees meer: Privacy & cookies.

  Ik accepteer deze cookie.
EU Cookie Directive plugin by www.channeldigital.co.uk