48 Vriedag, 27 september 2013 - Zeuktocht nöör Henk... . Ravelijn Deventer... .

> Categorie: KONINKRIJK KONKELFOES 3 Gepubliceerd: vrijdag 04 oktober 2013

 

Moandag de drieeëntwintigsten september is mien Ali jörig ewest. Zundag de negenentwintigsten bin ik jörig. Wiej viert op diee dag met onze noaste familie beide geboortedagen dan in Twello, bie Korderijnk, het vroggere ‘Stationskoffiehuus’ bie het nieje spoorstation. Achtendertig binne wiej dan in getal! Veurwöör een hele schäre!

Veur diee tied wil ik nog wat volbrengen. Ik mot nog een “De Moespot” kwiet. Veertig mosse ik ter bezörgen in Dèventer en umstrèken en ene kan ik ter nieet kwiet. En dat vind ik alderbastend rot. Want dit drieemoandelijkse blad is het liefblad van een boel lèzers diee plezier belèèft an hun “Neersassische Strèèktaal”. Töt noe an toe wieren ze altied per post bezörgd, möör noe één exemplaer loaten bezörgen al ene euro tachtig kost, hebbe wiej besloaten ze eigens bie onze leden te brengen. Van de wèke is het mien gelukt ter negenendertig op hun plaatse te kriegen in Diepenveen, Dèventer, Schalkhaer, Colmschoate, Battum en Gorssel, möör diee enen is nieet gelukt en diee is noe net veur een man diee vergreujd is met zien stad: Dèventer. Ik ken hem as ‘Henk’. Zien achtername neum ik feitelijk nooit ‘Van den Berg’. Ik ken hem hoaste mien hele lèven al, want hee is net as ikke ‘buten de Noordenbärg’ geboren en wel an de Zandweerd. Ik heb wel een adres van hem, möör ik wete dat hee döör al een antal jören, een stuk of driee, nieet meer wönt. Een paer jöör terugge heb ik hem nog ens een keer opehaald veur de soaterse bie-eenkomst in ‘De Notenhof’ in Diepenveen. Toen was e nog nieet helemoale genezen van een zwöre griep met longontstèking. Döördeur was hee een klein beetjen achteruutegoan. Döörnoa kwam e nieet meer op de ‘club’. Dan heur ik van een zwoager van mien dat Henk is goan wonen op “Sint Jürriën”. Ik wete natuurlijk nieet bèter of hee hef zien nieje adres an de dialectkringe deuregeven. Korte tied later vernem ik dat e weer verhuusd is en een niej adres is nieet bekend. En noe zit ik met “De Moespot” in mien mage en dat veult nieet lekker. Ik beslute moatregelen te nemmen. Noa mien middagslööpken pak ik um een uur of driee de auto en ik rieje nöör zien olde adres in de ‘schildersbuurte’. Ik belle bie de huidige bewoners. Een vrindelijk vruiwken dut lös. Ik vroage wöör of Henk ebleven wèzen kan. Zee kump nieet verder as ‘St. Jürriën’, möör zee weet nog wel te vertellen dat de buren an de oaverkante precies weet van de hood en de rand. Ik stèke oaver. Op dat adres wördt mien taal esproaken. Dat maakt het al een stuk makkelijker. De zönne des huzes weet dat een paer huzen verderop vrinden van Henk woont diee zien laatste adreswieziging ehad hebt. Henk blik verhuusd te wèèn nöör het ‘Jordensplein’. Ik kriege het nummer van zien woning derbie. Ik bedanke alle medewerkenden, schakel mien navigatie in en rieje deur de binnenstad en oaver de ‘Handelskade’ nöör de ‘Snipperling’. Wat een prachtige woningen op dat plein! Ik kieke mien ogen uut. Ik bin bliej dat ik an mien zeuktocht begonnen binne. Wat een licht! Wat een glas! Henk zien huusnummer blik in een Verzörgingstehuus te wèèn. Döörumme gooi ik “De Moespot” in zien brieevenbusse. En dan riej ik bliej nöör huus: eerstens: Henk heb ik evonden. Tweedens: “Ravelijn”, zoo heet dit huus, zal een goeie plaatse veur mien collega dialectschriever wèzen! Want zoo heb ik hem leren kennen, een man diee iedere zundagmärn een stuksken Dèventers in zien schrift schreef en meschiens nog schrif.

Thuus ekommen bel ik hem onmiddellijk op. Ik kriege een wärreme vrouwenstemme an de liene. Zee rup Henk an de telefoon. “Gerrit, da’j mien evonden hebt …,” zeg e verwonderd. Wiej proat nieet zoo lange met mekäre. An het ende van het gesprek zeg ik da’k zien groeten an de anderen oaverbrengen zal. Ik zette mien toestel op het basisstation. Ik veule mien voldoan.

Ik zette mien kompjoeter an en koekele Ravelijn Deventer … Een wondere wereld geet lös … 

 

Wij gebruiken één cookie, die essentieel is voor het functioneren van deze website. Lees meer: Privacy & cookies.

  Ik accepteer deze cookie.
EU Cookie Directive plugin by www.channeldigital.co.uk