47 Zoaterdag, 21 september 2013 - "Mooie Dorpsstroate ... ."
Het wördt een mooie dag; dat ziee ik zoo as ik nöör buten kieke noa het opstoan. Wiej kunt het dorp wel ingoan straks. Der zult verscheidene kröömkes stoan ter gelègenheid van de oapening van het verniejde centrum van mien woonplaatse.
Ik hale de krante uut de brieevenbusse en zeuke allereerst de ‘Familieberichten’. Alweer een hele olde bekenden oaverlejen diee jörenlang met zien gezin op de ‘Hemeltjenskamp’ ewoond hef. Hee is van negentien eenendertig en dus nog vier jöör jongeder as mien. Ik hebbe te doon met zien vrouwe en zönne, want wat zult zee man en vader missen! Hee was zon rezzenabele keerl! Straks zulle wiej èven langes “Passe Partout” lopen om een mooie kaerte te kopen om ons meelèven te kunnen betugen.
Um tien uur drinke wiej koffie en döörnoa wandele wiej het dorp in, Ali veur alle zekerheid met de rollator: “Ik voel me weleens wat zwiemelig op de benen”. Haer blooddruk, de onderdruk in de volksmond, is wat an de lege kante. Butendat zulle wiej zeker anderhalleve kilometer motte sjouwen, en Ali wördt moandag oke al drieeëntachtig. Gelukkig stoa ik nog wel goed stevig in de schonen, allewel ik nieet meer zoo härd lope; ik kuiere möör wat.
Tegen elleven lope wiej in de Dreiumsweg. As ik langes het huus komme wöör Teun Udink ewoond hef, denk ik an de tied da’k nog Sunterkloas wazze. Teun was mien vrolijke, springende, grepkes makende pikkie. Zien name was dan Pedro. Sandro was mien stille, rustige pikkie; dat was Henk Gerrits. Diee woonden twee stroaten verderop. Ik betrappe mien derop da’k lachend verder lope. Dan komme wiej langes “Turn Around”, op zien Diepenveens “De Dreiumme”. Toen wiej in negentien tweeënvieftig in Diepenveen kwammen wonen, was ter een greuntezaak evestigd. ‘Kruutbos’ zeie wiej altied, möör de zaak wier al edreven deur Riesebos, zien schoonzönne. De zönne van Riesebos, Jan, hef jören elejen al de zaak opeheven. Patrick Legebeke hef ter toen een kapsalon evestigd en diee weer an een ander van de hand edoan. Op de hook van de Dreiumsweg en de Dorpsstroate steet rechts een winkeltjen met moderne ärtikelen veur in huus. In tweeënvieftig had Middelburg döör zien elektrozaak en zien verkooppunt van butagas. Middelburg is later nöör de Dorpsstroate egoan, wöör noe Harmsen de keurslager zit. Links had in vrogger tied Hoetink zien krudenierswinkel met drogisterieje. Later hef Theo, zien zönne, de zaak oaverenommen van zien olders. Hee was getrouwd met Toos Albers, een oldleerling van mien op de schole in Hengforden. Helaas is zee vrie kort elejen estörven. Deurdat ik an haer denke, ziee ik egensnieet watveur lekkere dinger in het kröömken veur de winkel uutestald bint.
Èven verderop komme wiej langes een löge plekke diee links lig en wöör in tweeënvieftig Van de Vlekkert nog met zien “kruidenierswaren en comestibles” evestigd was. Later zat döör Willemsen met zien meubel- en textielhandel. Dat is allemoale ver verlejen tied. De pas verniejde zaak van slager Harmsen steet ter fier tegenoaver. In de vieftiger jören van de veurige eeuw was dat nog een löge plekke: een heel ende van de weg stond toen het olde gebuiwken wöör een smederieje evestigd ewest was. Middelburg liet op diee plekke derveur zien elektriciteitszaak bouwen en de olde smederieje wier ofebroaken. Noast Harmsen kui’j de beide laatste jören lekker èten bie “Zonnig”. Veur diee tied zat ter een kusthandeltjen in diee winkel en döörveur Paalman de bakker. Der steet bie Harmsen een kröömken wöör onder anderen Sallandse balkenbrie verkocht wördt en ik kope natuurlijk een pond.
Wiej komt noe langes de ‘Mediepost’ oftewel de Diepenveense vestiging van “Kringapotheek Borgele” in Dèventer. Makkelijk dadde wiej hier onze medicienen halen kunt. Jören elejen was hier de schoonhandel van Ali en Gerrit Pas evestigd. Diee kwammen zon beetjen gelieke met Ali en mien in de beginjören vieftig in Diepenveen wonen. Zee kwammen, geleuf ik, van Wierden. Ze bint noe oke al jören uut de tied.
Dan komme wiej langes de huusartsenpost Trompetter-Van Woerden, Trompetter, Quattero. In tweeënvieftig zat döör dokter Visscher nog, döörnoa dokter Clous. Ik kan nieet anders zeggen as dat Diepenveen altied prima huusdokters ehad hef! Noast de huusdokters drif Van Rijssen zien Diepenveense ‘bakkersfiliaal’. Diee bakker bakt in Wesepe, möör hef gelukkig het ‘wärreme bakkersgat’ in Diepenveen opevuld. Noast dit winkeltjen zit al driee generaties lang het garagebedrief van Kemper. Döörnoast hebt vanof oktober tweeënvieftig töt midden zesenvieftig Ali en ik ewoond, veur wiej veur enige tied weer nöör Dèventer gingen. Tegenoaver ons was toen het postkantoor onder leiding van postkantoorholder Brinkers. Later hef zien zönne Herman der met zien gezin ewoond. Noe woont ter nog steeds de familie Peters. Albert Heijn zit ternoast. Middeldorp drif diee ‘AH’. Zien olders hadden in het midden van de twintigste eeuw de zaak, slagerieje, oaverenommen van Veldman, diee de zaak edreven had onder de name ‘VIOS’, ‘Veldman Is Onze Slager’. De Middeldorps lieten de zaak greujen, eerst töt een zellefbedieeningszaak onder verschillende namen, toen wier het mede een AH-filiaal, met behold van de uutstèkende slagerieje. In ‘ons’ olde huus zit al jören het schildersbedrief en ‘klusjeszaak’ Van de familie Pasman. Zee hebt op geweldige maniere het bedrief uutebouwd töt een zaak diee nieet enkeld schilderswerk uutvoert, möör oke vloerbedekking en stoffering op zich nemt. De derde generatie, twee zöns, doot het buten- en binnenwerk in de bouwwerken, en op de tweeden drif met hulpe nog steeds de winkel. En as ik döör èven met mevrouw Pasman stoa te proaten, schut mien oke nog te binnen dat ik al jören mien kleding bie de zaak brenge um te loaten reinigen.
Wiej loopt deur töt an de Roeterdsweg, het “Hof van Salland”. Op het nieje plein op de hook zal vanmiddag um vief uur de verniejde dorpskern e-öpend worden. Noe is het ter nog stille. Ik kieke nöör de twee huzen tegenoaver het dorpshuus. Links op de hook zat in onze eerste tied de kapper, Snel. Döör liet ik mien toen altied knippen. Snel en zien vrouwen bint ter al jören nieet meer. Dernoast was de huusholdelijke winkel en spölgoedzaak van Frederiks. De olde Frederiks was doodgraver van de Diepenveense begraafplaatse an de Roeterdsweg. Noa de dood van zien vader nam Henk Frederiks met zien vrouwe Dicky de zaak oaver. Zee hebt het heel lange vol-eholden. Noe is de winkel een woonhuus. Henk woont ter allene, want zien vrouwe is allage oaverlejen. Dat laatste herinnert mien deran dadde wiej nog kaerten mot kopen um onze deelnemming met het oaverliejen van twee olde bekenden te betugen.
Zoo kere wiej umme en wiej kuiert langes de Dorpsstroate en de Oranjelane terugge. Wiej goat langes “Passe Partout” en kiest bie het kaertenrek hele mooie kaerten uut. Ik kieke nog ens goed rond. Iej zollen nieet zeggen dat hier vrogger de smederieje van Grievink, later Eduard Heyser, evestigd was. Dan wandele wiej nöör huus. Dan zeg ik: “Jammer dat Toos, Dicky, Gerrit, Alie, Hans en al diee anderen dit nieet meer zieen kunt, diee mooie Dorpsstroate … .”
