44 Vriedag, 13 september 2013 - "Alles dreit um de mense, um "IK" ...!"
Ik prieze mieneigen steeds gelukkiger da’k gin filosoof binne. Ik komme steeds meer töt de ontdekking dat ik op mien geveul meer drieve als op mien verstand. De dreum oaver ‘negen ellef’ hef mien volledig met de neuze op de feiten edrukt. Geveulens tiedens de vlucht hadden de oaverhand: geluk, verdrieet, vreugde, meelèven, angst, lèven, dood, ofkomst. Ik verbinde al diee dinger völle meer met geveul as met verstand. Ik veule dat “IK” het middelpunt is van het universum wöörin ons zunnestelsel lig. Mien is eleerd dat de zunne in ons stelsel het “Dink” is wöör “Alles” um dreit. Ik hebbe langzamerhand ontdekt dat het ‘ogenbekeukelderieje’ is. Het verstand van de mensen wördt bedroagen deur de zoo-eneumde natuurwetten. Ons letterlijke zieen wördt bedroagen an alle kanten. Het dut ons alles recht zieen wat krom is: recht besteet nieet in het universum! Dat zit nieet buten ons, het zit in ons, in ons heufd en ons härte! Döör spölt zich alles of! Alle dreit döörumme, um “IK”. Bie mien geboorte heb ik mien ontworsteld an “IK” van mien Moder, diee bevrucht eworden was van “IK” van mien Vader. En as ik duzenden generaties weerumme goa, kom ik uuteindelijk in “IK”, diee altied al was en eeuwig blieven zal.
Ik wete van mieneigen dat dit alles gin geleuf van mien is, möör een zeker universeel weten, wat zoo wonderböörlijk is dat ik het nieet bevatten kan. Straks, ik hoape dat ik nog heel lange gezond en gelukkig lèven mag, kump ter gin ende, möör zal ik weerkeren in “IK”, diee ik veur het gemak möör “Intelligente Krachtbron” neume, al kan ik mien döör niks bie veurstellen.
Een stuksken van “IK” hef opesloaten ezèten in Moder, Vader, Grootolders, Oavergrootolders en goat zoo möör deur. Zon stuksken zit oke in mien opesloaten. Het zit opebörgen en goed beschermd in mien heufd, in mien ‘Brein’. Ik zol ook kunnen zeggen in mien ‘Schedel’, want ik wete dat ‘brein’ in het Grieks ‘brechmos’, ‘schedel’ is. Diee schedel bevat de gaten wöör van butenof de veur mien neudzakelijke gegevens binnenkomt: twee gaten um wöör te nemmen met de ogen, twee gaten um wöör te nemmen met de oren, twee gaten um wöör te nemmen met de neuze en één gat veur het op gang holden van dat alles: de mond. En dan bint döör nog de tast en het geveul. Dan bint ter nog twee oapeningen um de ofvalstoffen te lozen en veur de vrouwen is ter nog een extra gaatjen um een nieje “IK” op de eerdkloot te zetten.
Zelfs de grootste geleerden snapt ter allemoale niks van! En toch werkt zee dermee asof alles esnejen koke is. Ze nemt scherp wöör met al hun zintugen, weet feitelijk wel dat diee hun bekeukeld, möör toch weet zee een aerdig beeld van het ‘Heelal’ of de ‘Heelallen’ veur ons op te bouwen. Ze slaagt terin veurwerpen deur ons zonnestelsel te loaten suzen en op dit moment is ter wärempel een ruumtevoertuug bezig ons stelsel te verloaten en de interstellaire ruumte in te vlieegen. En dat alles wiel ze egeenieet weet hoe of feitelijk diee onmetelijkheid in mekäre stek!
De eerde en de andere planeten zollen um de zunne dreien. Ogenbekeukelderieje! Alles dreit um de lèvende wèzens, um iedere ofzonderlijke individu, of diee noe van dierlijke eursprong of planteerdig is. Het dreit allemoale um zien of haer “IK”, ezèteld in het “Brein”. Ons “Brein” is het centrum van alle gebeuren. Het totale “Brein”, veur ons nieet veur te stellen, döör kump alles uut voort. Niks “Oerknal”, “Bron” dat is de name van het “Brein”. Onze geestelijke bronnen bint döör ofgeleiden van. Wiej mot goed beseffen dat het alles um ons dreit, um onze gedachten en nog meer om ons geveul! De loop van de geschiedenis wördt bepoald deur ons, de lèvende wèzens, met name de mense. Dat is mien weten! Wiej bepoalt, meer nog met ons geveul as met ons verstand de tookomst van het universum. “Alles dreit um de mense, um “IK”…”. En diee mense lef enkeld op disse planeet! Geleuf mien möör …! Döör dreit alles umme! Ik zol der een prèke oaver holden kunnen... .
