42 Zoaterdag 7 september 2013 - "Rollecate Vereeuwigd"
Eerste zoaterdag van september. Precies um tien uur oapen ik de eerste bie-eenkomst van de “Strèèktaalgroep Dèventer en Umstrèken” in de “Notenhof” in Diepenveen. Ik besprèke het programma. De anwèzigen bint bliej dat ze het hele programma op papier kriegt, zoodat ze zieen kunt wiee der het net begonnen seizoen optreedt. Veural de anekondigde komst van Albert Bartelds, strèèktaalconsulent van de “IJsselacademie” in Kampen, Gerrit Kraa, old strèèktaalconsulent van het “Van Deinse Instittuut” in Enschede, J.C. (Hans) Gerritsen, veurzitter van het “SONT”, in het daagse lèven burgemeester van Haaksbergen, Thea Kroese, nog steeds – mangs - medewerkster van “TV Oost” en de bekende pastor uut Diepenveen, Peter Dullaert, diee pas nog nöör de ‘Jongerendagen’ in Brazilië ewest is, wekt een vreugdevolle stemming op, want dit bint nieet de eersten de besten. De märgen verlöp dan ook heel lekker.
Azze wiej noa twalef uur thuuskomt, pakt Ali metene de krante, um te kieken hoe late of de uutreiking van het eeuwbook van “Rollecate” plaats vindt. Diee bie-eenkomst blik um twee uur te beginnen in het schoolgebouw an de Tesschenmacherstroate. Dan hebbe wiej nog genog tied um ons patatjen met mayo en een fricandelleken te èten. Wiej kunt döörnoa oke nog een hallef uurken rusten.
Wiej bliekt vlak veur de heufdingang te kunnen pärkeren. Enthousiast worde wiej ontvangen. Diee geestdrift wördt nog groter as de luu van het organiserende comité heurt dat Ali de dochter is van de man diee in tweeëndertig de Rollecatetuin ‘eschoapen’ hef. Wiej treft hier een boel olde bekenden, docenten en oldleerlingen. Al gauw zitte wiej gezellig met iederene te kletsen en wiej merkt egeenieet dat wetholder Jos Piery, diee wetholder De Jager vervangt, der alsmöör nog nieet is.
As de wetholder der eindelijk is, kan het book dat emaakt is deur een achttal mensen vol inspiratie, epresenteerd worden. “Rollecate Vereeuwigd” blik het te heten. De wetholder reikt de eerste driee exemplären uut. Het allereerste book geet nöör de laatste directrice, Lies Molenaar. Diee heb ik net nieet meer mee-emaakt as leidster van de schole, want zee wier in achtenzestig directrice, en ik bin in zesenzestig bie “Nieuw Rollecate” vort egoan.
Noa diee kleine plechtigheid kunt de mensen de boken kopen. Ondertussen wordt häpkes en drenkskes anebojen. De boken vlieegt as het wäre weg. Ik kope der twee, ene veur onseigen en ene veur het familie-ärchief, want Ali haer vader hef tweeëndertig jöör an “Rollecate” ewerkt en ik driee.
Dan nemme wiej ofscheid. Op de thuusrit hebbe wiej het teroaver dat dit een feest van herkenning was en dat de periode negentien dertiene tweeduzend dertiene op weerdige wieze afesloaten is eworden!
Azze wiej thuus bint, pakke wiej ieder een book. Wiej bladert het deur. Op pagina 068 steet een prachtige foto van Ali haer vader, H.A. Witteveen, en Koningin Juliana. Ze stoat met de leerlingen van Vader in de tuin van de schole. En op pagina 094 ontdekke ik G.W. Kuijk, diee mee-werkt hef an het “Gouden Gedenkboek”, 50 jaar Rollecate. Oaver diee beide dinger gleuj ik van trots, want nieet enkeld “Rollecate” is vereeuwigd, Vader Witteveen en ik tèvens. Jammer dat Vaders name nieet vermeld steet!
Ik zegge onmiddellijk tegen Ali wat of ik ontdekt hebbe en ik ziee haer glunderen. Ik zegge: “Ik ben blij voor de familie dat ik twee boeken gekocht heb!” En Ali knikt. En dan herinner ik mien inens dat ik begin september drieeënzestig an “Nieuw Rollecate” begonnen bin en dat is precies een halve eeuw elejen. Ik had dat feitelijk mien collega’s Tine, Han, Grietje, Lies en Gosse motten vertellen, möör joa, ik denke der noe pas an.
