39 Woensdag, 28 augustus 2013 - Domweg gelukkig in "De Pellerije"

> Categorie: KONINKRIJK KONKELFOES 3 Gepubliceerd: donderdag 29 augustus 2013

 

Vandage wille wiej aventuren belèven in de natuur, samen met onze zönne, zien vrouwe en onze jongste kleindochter. Het wördt een prachtige dag in het spölbos in “Park 1813”, op de Holterberg en um vief uur ’s middes smaakt de boerenpannekoke in het “Pannenkoekenhuis” in Lettele nöör meer. Ik veule mien de hele dag gelukkig en zonder zörgen, löög um zoo te zeggen en a’k iedere keer nöör Ali kieke, ziee ik dat zee oke bliej is. Onderweg schut ter mien een gedicht van J.C. Bloem in gedachten wat ik altied heel mooi möör onbegriepelijk evonden hebbe: “De Dapperstraat”. Ik heb altied evonden dat Bloem döörin ofrèkent met de schöörse natuur in Nederland! Dat stuksken bos, nieet groter as een krante, kan e bliekböör missen as kiespiene, allewel ik ter helemoale nieet buten kan.

Um hallef zesse binne wiej weer in “De Pellerije” en wiej genieet noa met een lekker köpken koffie. En as um zeuven uur de kinder vort bint, griep ik mien “Domweg gelukkig, in de Dapperstraat” uut de bokenkaste, een bloomlèzing van hoaste drieehonderd bladziejen, op het ende van de veurige eeuw uutegeven deur ‘Uitgeverij Bert Bakker’. Op bladzieje honderd tweeënnegentig vind ik het: J.C. Bloem – DE DAPPERSTRAAT – Natuur is voor tevredenen of legen / En dan wat is natuur nog in dit land?/ Een stukje bos, ter grootte van een krant, / Een heuvel met wat villaatjes ertegen. – Geef mij de grauwe, stedelijke wegen, / De in kaden vastgeklonken waterkant, / De wolken, nooit zo schoon dan als ze, omrand / Door zolderramen, langs de lucht bewegen. – Alles is veel voor wie niet veel verwacht. / Het leven houdt zijn wonderen verborgen / Tot het ze, opeens, toont in hun hoge staat. / Dit heb ik bij mijzelve overdacht, / Verregend, op een miezerige morgen, / Domweg gelukkig, in de Dapperstraat.

Driee keer achter mekäre lèès ik dit sonnet. Ik merke da’k het steeds nog uut mien heufd veurdrage. En dan, de derde keer, is döör de belèving van dit vers! Ik ziee Bloem döör in de miezerige règen, zeiknat, deur de Dapperstroate goan, möör ensklaps is döör in hem dat geluksgeveul van de oapenbööring van het lèvenswonder, zooas ik dat oke nog dagelijks belèven mag en ik griepe plotseling een stuk papier en ik schrieve met mien oranje balpenne van ‘Beter Horen’: “DE PELLERIJE”- Noe ik older worde, wördt mien bewèèglijkheid steeds minder. / Ik worde stiever en doo stoadig stappen terugge. / Soms trekt een strakke scheut van piene deur mien rugge. / Bie domme dinger doon ervöör ik een boel hinder. – Der samen uutgoan is ter nieet meer zoo vake bie. / Gelukkig magge ik altied nog autoriejen. / Zoo komme wiej veurbie de plaatsen Dèèmter, Olst en Wieje. / Wiej hooft nieet thuus te blieven en dat maakt ons heel bliej. – Toch kump meschiens de tied dat wiej hoast niks meer kunt. / Dan binne wiej an huus ebonden, möör onze geest reist meuglijk vriej. / Dus wonderen belèven blif ons meschiens egund, / As wiej ze in de kop nog holden kunt op ene rieje. / Ik hoape dat wiejluu samen diee wonderen belèven kunt, / Gewoon, domweg gelukkig in “De Pellerije”.

Ik heb dit alles zoo spontoan in het klad neereschreven, da’k ter bie het oaverlèzen niks an verandere. Het sonnet is meschiens nieet mooi, möör het gef zuver weer wat ik uutzingen wil. Zoo zal ik het in het ‘net’ noteren!

Ik stoa op. Het is al late. Buten is het al donker. Ali is al nöör de sloapkamer en ik goa oke möör. Bloem geet met mien mee.

Ik zette op de sloapkamer de wekkerradio an. “Met het oog op morgen” begint net met de tjoen “Koete nacht frojnde …, es iest tsaait fuur miech tsoe keejen …”. Ik hoape dat het ‘fuur miech nog lange kaain tsaait iest oem tsoe keejen … . Oke al zon wonder, diee taal! Iej kunt ter oew hele geveul en belèven mee uutdrukken. Meschiens oke nieet, want hoe vake mo’j nieet nöör de juuste termen zeuken … . !?

 

Wij gebruiken één cookie, die essentieel is voor het functioneren van deze website. Lees meer: Privacy & cookies.

  Ik accepteer deze cookie.
EU Cookie Directive plugin by www.channeldigital.co.uk