38 Moandag, 26 augustus 2013 - Loat zullie hullie gang möör goan ...!

> Categorie: KONINKRIJK KONKELFOES 3 Gepubliceerd: dinsdag 27 augustus 2013

 

Het beloaft vandage weer een prachtige dag te worden. De hele wèke hierveur is het al prachtig weer ewest en dat is het nog. Buten trek ik de parasol lös en binnen zet ik met de hand an de knop het zunnescherm op de juuste stand. Dan goa ik koffiezetten, veur driee personen, want mien jongste zwoager, Gert, breur van Ali, kump op visite um tien uur. Ali hef ondertussen haer brood op en geet gezellig in haer ‘stoa-op-stool’ zitten.

Um precies tien uur geet de belle, mien zwoager is een man van de klokke. Ik loat hem binnen. Azze wiej gezellig an de koffie zit, zeg ik: “Wiej zult ens èven bellen!” – “Oh gut, ik heb zijn verjaardag helemaal vergeten”, zeg Ali. Mien zwoager kik verbaasd. Ik belle mien jongste zönne, want diee is jörig. Ik zette het luudsprèkertjen op ‘härd’. Mien zwoager heurt an de stemme um wiee het geet. “Oh ja”, zeg e.

Wiej feliciteert alle driee mien zönne met zien verjöördag en wiej bint al gauw met hem uuteproat en Ik zette het toestel op zien veutstuksken. Dan drinke wiej onze tweede komme koffie. Geneuglijk zitte wiej bie mekäre töt mien gedachten ofdwaalt en ik in andere landen bin!

Ik stoa inens bie Lex Runderkamp in Syrië en ik lope met hem langes in mekaere edonderde huzen en gebouwen. Ik komme met hem döörbinnen en ik ziee ze liggen, de verkrampte lieken, de sidderende stervenden, en ik veule de golven gifgas oaver mien vel streumen. En dan bin ik plotseling in Egypte in Caïro, bie Sander van Hoorn, en ik heure uut zien mond hoe of de militairen de leden van de ‘Moslim Broederschap’ an het ofmaken bint. En ik heure Geert Groot Koerkamp, een Schalkhaerder, vanuut Moskou vertellen oaver de reactie van Poetin op al dat verschrikkelijke gebeuren in de wereld. En ik heure van Geert hoe of de homo’s in Rusland in werkelijkheid behandeld wordt deur de oaverheid. En ik ziee op de teevee dinger gebeuren in het Verre Oosten op militair, politiek en seksueel gebieed. En ik worde kwoad op mieneigen, um reden dat ik het geveul hebbe dat het mien allemoale niks dut. Ik zitte hier op mien luie kont en ik doo niks! Möör ik realisere mien oke dat de hele wereld niks dut! Wat is dat feitelijk? Is het angst um zellef ten onder te goan? Is het de vreze dat de wereld oaverniej in een grote oorlog verzeild raakt? Is het, wiel de grote machten op eerde bang veur mekäre bint en desnoods de hele mensheid offeren wilt? Ik wete möör één ding: Op mien lèèftied kan ik mien der nieet wèzenlijk meer mee bemeujen! Ik kan enkeld möör ofwachten wat of tervan kump. Ik modde diee dinger van mien ofzetten en … gelukkig wèèn. Met mien vrouwe en mien zwoager an de koffie hier, met mien kinder, kleinkinder en achterkleinkind, met onze medebewoners hier in “De Pellerieje”, met alles um mien hen. En ik veule plotseling dat ik mien eigen lèven leiden en liejen mot!

“Zoo”, zeg ik inens. -  “Wat zoo?” vrög mien zwoager. -  “Niks”, zeg ik. ­ “Ik goa möör ens weer”, zeg mien zwoager. – “Pas op veur een gifgasanval”, lache ik. Mien zwoager kik mien nieet vattend an. “Vervanmienbedshow!” zeg ik. Ik kieke der heel ernstig bie. Hee hef mien deur! “Wiej lèèft in een vremde wereld”, zeg e dan. “Oke Dèventer is zon wereld. Denkt möör ens an het nieje stadskantoor en wat een ruzie dööroaver is! Ze liekt allemoale wel eschift!”

As mien zwoager vort is, denk ik noa oaver diee laatste opmerking: Ze liekt wel eschift. Dat is de spieker op de kop eslagen: eschift, verzoerd, bedorven, verwrongen, abnormaal, zieek. De mensheid is zieek! Ik kan nieet anders doon als ‘gezond’ lèven! En lèven is ‘doon’, nieet ‘lullen’! Dan denk ik plotseling aan een mooi liedjen, of lieever an ene zinne dööruut: “Laat mij m’n gang maar gaan …”. En ik veule mien intens gelukkig.

Ik goa mien gang! Loat zullie hullie gang möör goan … ! Wiej zieet wel wöör ovve wiej eindigt! Noe wete wiej dat nog nieet! … Möör het blif allemoale hetzelde … .

 

Wij gebruiken één cookie, die essentieel is voor het functioneren van deze website. Lees meer: Privacy & cookies.

  Ik accepteer deze cookie.
EU Cookie Directive plugin by www.channeldigital.co.uk