33 Moandag, 12 augustus 2013 - Prins Friso sterft ...
In de märn zit ik meestens te werken an de kompjoeter. Ik kan dat rustig doon en toch an heel andere dinger denken as wöör ik mee bezig wèèn mot. Disse keer zit ik te denken an Kowet, dat op zon geweldige maniere zoaterdag ewonnen hef van ADO met 2 – 1. Ik hebbe eheurd dat ter zon kleine zeuvenduzend man is kommen kieken nöör diee wedstried. Allewel ik wat e-mailtjes zit te tikken, dwaalt mien gedachten steeds of nöör dat kleine wonder van het weerummekommen van Kowet in de eredivisie. Vremd is dat! Of feitelijk oke nieet, want ik bin toch jören elejen een fanatiek voetballieefhebber ewest!
Um tien uur schei ik teruut en zette veur Ali en mien een lekker köpken koffie. A’k nöör buten kieke, ziee ik de zunne deurbrèken. Het beleuft een mooie dag te worden. Vanmiddag kunt Ali en ik wel ens effen een ummeken maken deur het dorp, dan kunne wiej alle infrastructurele veranderingen nog ens goed bekieken: Diepenveen is völle mooieder eworden, enkeld diee rot verkeersdrempels verpest de vrindelijkheid. Fietsers, motoren, scooters, auto’s liekt gin van allen welkom! Amo van Ham, het “verkeersgeweten”, hef ter al uutvoerig andacht an besteed.
Noa de koffie luuster ik een tiedjen nöör “De Brink”, het märgenprogramma van de ‘Drentse Radio-omroep’ en dan maak ik ons middagmoal klöör: bami met babi pangang, gehaktbällekes in ketjapsaus en curry. Wiej èèt het met smaak. Dan geet Ali väste rusten en ik wasse of. Dan goa ik oke èven op één oor.
Um driee uur drinke wiej thee en ik zette de radio op “Plein 5” van de NCRV, disse keer met Govert van Brakel, Hylco Span zal wel met vakantie wèèn. Der is altied een ‘cryptospan’ op te lössen, het umgekeerde van een ‘cryptogram’. Noe blik ter ene emaakt te motten worden op ‘muziekinstrument’. Dat lik mien roazend meujlijk, möör ik woage het toch. Ik komme töt “Gereedschap om noten tot een luisterrijk geheel te rijgen”. Ik vinde het nieet zoo gek edoan. Tegen kwärt oaver driee bel ik 0800-3000555. Een man steet mien te woord. Ik magge mien oplössing vertellen en ik zal terugge-ebeld worden um in de uutzending mien oplössing te geven. Ik slute het gesprek of. Dat he’k nauwelijks edoan of ik heure Ali noast mien zeggen: “Ik zie op mijn i-pad op teletekst dat Prins Friso overleden is”. Ik schrikke op! Diee jonge lig al hoaste anderhallef jöör in coma en noe … is e der nieet meer!
Metene dernoa klinkt Govert zien stemme deur de ether: Hee dut dezelde mededeling diee ik al van Ali eheurd hebbe. Hee vertelt ons, luusteraers, dat met het oge op disse gebeurtenis het programma wat ewiezigd wördt en dat het veur vandage ofelopen is met het ‘cryptospan’. Ik kan mien dat heel goed veurstellen bie een toch wel plotseling drovig gebeuren wöör zoo weinig muziek in zit. Ik luustere verder töt vier uur nöör de radio.
Dan zet ik de teevee an op ‘ene’. Döör is inmiddels een deurlopend programma bezig oaver de dood van Johan Friso Bernhard Christiaan David, oftewel Prins Friso. As gebrukelijk bie een zeer bekende Nederlander wördt zien doopceel elicht en het ski-ongeluk in Lech wördt weer heel breed uutemèten. Tussendeur nemt de beschouwers Prinses Mabel oke nog mee, wat ik nieet bepoald kies vinde. Luana en Zaria wordt eneumd, de beide kinder van Friso en Mabel. Allewel een boel dinger Ali en mien bekend bint, blieve wiej toch kieken.
Ook wordt ter burgers e-interviewd, onder anderen in Bergen op Zoom. De meeste mensen vindt het sterven veur Prins Friso een verlössing, möör veur Mabel en veural veur de kinder heel verdrieetig. Dat bevestigt feitelijk wa’k ter zelluf ook van vinde.
Dan goa ik oaver töt de andere dinger van disse dag. Toch komt mien gedachten nieet lös van het verschiensel ‘coma’, toostand van volslagen bewusteloosheid, ononderbroaken sloap. En ik veule mien heel klein worden … . Prins Friso …, in coma …, sterft … . Heden hee, märgen wiej!