29 Donderdag, 25 juli - Oprechtheid ...
Märgriet de Jager-Stegeman is noa haer ‘ongelukkige’ optreden oaver de ‘Thuuszörg’ heel dieepe deur het stof egoan, vernemme ik via de media. Ik vinde dat haer dat in hoge moate siert. Ik proate der uutgebreid met anderen oaver en ik stelle väste dat bie verscheiden mensen haer imago as wetholder een stuk verbèterd is! Natuurlijk bint ter oke een kladde van diee zwärtkiekers diee haer nog steeds nieet zieet zitten, möör diee zaggen haer toch al nieet stoan, dat hol iej met het politieke gedoo altied. Ik hebbe wel zon idee wöörumme de beeldvörming um haer hen wat veranderd is. Dat misselijke gedoo met diee ‘Thuuszörg’ völt toovallig samen met gebeurtenissen rond personen uut de grootste regeringspartieje! Wat döör goande is, lik nieet zoo gezond veur de politiek: de rechtschoapenheid is bie diee club in het geding! En noe mot ik bie het “beschouwen” van de integriteit binnen diee club oppassen met namen neumen, want zelluf denkt de meesten binnen diee groep anders oaver diee dinger as ik en de grote meerderheid in Nederland. Kiek, onze wetholder mag dan eigenwies wèèn en het mag lieken of zee een bord veur de kop hef …, eerlijk is zee. Kiek, denk ik, hier völt veur de burger in Nederland en dus oke in Dèventer, de klemtone: Zee is tenminsten eerlijk ewest.
Ik hebbe in mien eigen hele korte politieke loopbane meer van diee oprechte luu ontmoet. Ik denke an het jongste lid van de gemeenteroad toen, in negenennegentig, Ina Adema, geboren op driee juni achtenzestig. Märgriet en Ina hadden toen heel wat met mekäre te stellen. Möör Ina is noe mooi sinds tweeduzend negen burgemeester van de gemeente Veghel, noa de fusie met St. Oedenrode! En dat word iej nieet, a’j nieet honderd procent integer bint.
En dan denk ik an Loek Hartong, noa mien het oldste roadslid toen! Hem heb ik gister nog bie Harmsen, de keurslager, ontmoet. Een oprechter mense en ‘politicus’ kan ik mien nieet veurstellen. Hee vertelden mien gister dat e net as ikke de politiek nog wel volgt, möör der zich nieet actief meer mee bemeujt
Märgriet hef dus geluk ehad dat ter in disse tied steeds meer Nederlandse politici bint met een berg botter op de kop! En … de oprechtheid hef haer ered.
Ik wil zoo stoppen met compjoeteren, dus ik kieke möör ens èven wat ter nog an e-mail binnen kan kommen. Het is möör één berichken: Het kump van Tonia Dabwe – Mineke Foundation. Of het zoo wèèn mot! Weer twee van die vrouwen diee rechschoapen bint: Mineke en haer dochter Tonia. Tonia is nieet veur niks ekoazen töt “International African Woman of the Year”. Haer moder zol ik “International European-African Woman of the 20-th Century” willen neumen. Ik bin der trots op da’k zukke vrouwen in mien kennissenkringe hebbe. Ik lèze het bericht: ‘
“Beste Oom Gerrit en Tante Ali Kuijk,
Langs deze weg een berichtje van mij en van Mineke Foundation!
Hoe is het in Diepenveen? Hier in het centrum is het de afgelopen maanden een waar gekkenhuis geweest. Wel fantastisch al die aandacht, maar ook vermoeiend. Intussen ben ik druk bezig met mijn bestuur de plannen voor de komende 5 – 7 jaar uit te werken. Een mooi proces, wat wel veel tijd vraagt. Maar als het goed is, hebben we rond half augustus een eerste versie. Voor het einde van het jaar moet het definitieve stuk er liggen, dat wil zeggen ons stuk met de aanvullingen van ons team.
Alvast een heel fijn weekend gewenst. Groeten van Tonia.”
Hulde an de ‘Oprechtheid’ … Diee dieent en … denkt nieet an dubbelgedoo!
