27 Woensdag, 10 juli 2013 - Sponsoring ...

> Categorie: KONINKRIJK KONKELFOES 3 Gepubliceerd: donderdag 25 juli 2013

 

Verjöördagsbie-eenkomsten met mien familie mag ik graag, Ali trouwens oke. Vandage hebbe wiej der ene in Colmschoate, vlak noast de deure um zoo te zeggen. Ik wete van te veurten al dat dit een biezunder leuke ‘happening’ worden geet, want wiej bint allemoale Dèventersen en Kowet-anhangers! En der zult ter zeker een paer edronken worden op de ‘klompenjonges’.

Um ellef uur binne wiej der zon beetjen allemoale. Met zon twintig mensen zitten wiej verdeeld oaver binnen en buten. Het gesprek binnen geet al gauw oaver Kowet. “As ze der nieet een paer flinke sponsors bie kriegt, likt ze volgend jöör alweer uut de eredivisie”, zeg een breur van mien. “Wel nee, ze doot gewoon mee an de top”, zeg een nève. Ik beginne te lachen. “Weet iejluu welens wat of een sponsor feitelijk is?” vroag ik. De antwoorden vlieegt mien um de oren: “Dat is een mense of een bedrief wat geld gef an een sport- of andere club um döörmee reclame te maken”. – “Het is iemand diee met een worst gooit nöör een zieje spek”. – “Sponsoring is geld in het water gooien”. – “Een sponsor is een peetoom of een peettante”, zeg mien oldere breur Jan. Iederene is opslag doodstille, wööruut blik dat behalve Jan en ik gin mense hier dat Engelse woord in zien wöre betekenis kent! En dat völt mien tegen. Ik vulle nog an dat in Engeland zon zeuventig töt tachtig jöör elejen een sponsor oke een verzörger van een radioprogramma was, wöörbie e reclame veur zien eigen maakten. Verder vertel ik dat nog steeds de peettante van een pasgeboren kind diee baby ten doop holden mag! Dan begint een andere breur härd te lachen: “Weet iejluu wat of ik zoo mooi vinde?! Dat “Vitens” as ‘peetolder’ van “PEC” uut Zwolle wil goan optreden, want ze hebt water genog um diee club te deupen en stoande te holden. Ze mot diee club trouwens echt christelijk deupen, want de anhang, de härde kern diee meegeet nöör de uutwedstrieden, gedraagt huneigen as heidenen!” – “Ssst, loat ze het möör nieet heuren”, zeg ik.

Een zwoager van mien nemt noe heel ernstig het woord: “Ik mot oeluu eerlijk zeggen da’k het met een eventuele sponsoring van “PEC” deur “Vitens” principieel onens binne. Ik hebbe niks met voetbal en zeker nieet met profvoetbal en het is oke mien water en het bint oke mien centen wöörmee esponsord wördt.” Feitelijk kan ik döör niks tegenin brengen. “Butendat”, zeg mien zwoager, “mot ze Kowet, Heracles en andere clubs oke sponsoren, want schèle ogen maken mag nieet! De politiek mot ter zich möör ens tegenan bemeujen”. Mien lik dat nog nieet zon slecht idee. Möör ik denke nieet dat de politiek in dit opzicht wat te vertellen hef: de politici hebt terveur ezörgd dat alle dieenstverlening an de gemeenschap verworden is töt ‘geprivatiseerde kapitalistische monopolistische dwangofnemming en betaling van gemeenschapsveurzieeningen’ as water, energie en andere onmisböre veurzieeningen in bieveurbeeld de ‘Zorgsector’.

“Een peetoom is een ‘peter’, een peettante is een ‘meter’, möör sponsoring uut gemeenschapsgelden an wiee of wat dan oke, klopt veur gin meter”, zeg mien zwoager.

Binnenkort zult ter wel meer officiële berichten oaver “Vitens” en “PEC” nöör buten kommen, denk ik bie mienzelluf. Wiej zult de zaken op teevee, radio en in de krante wel volgen. “A’k eerlijk binne, mot ik oe wel bekennen da’k het in de grond met oe ens binne”, zeg ik tegen mien zwoager. – “Möör iej bint nog boaven de grond”, lacht diee.

Dan proate wiej verder oaver Kowet, dat zoo prachtig weerumme-ekommen is op het heugste peil! Olde tieden met Henneman Roelofs, Leo en Jan Halle, Willy Eyssink, Kees Kerkdiek (Kerkdijk), Jan en Abse Kolkman, Co de Roo, Hanny de Boer, Pleun Strik en goat zoo möör deur, doode wiej herlèven en wiej hebt een heerlijke dag.

Sponsoring bestond vrogger nieet, möör was het voetbal slechter … ?   

 

Wij gebruiken één cookie, die essentieel is voor het functioneren van deze website. Lees meer: Privacy & cookies.

  Ik accepteer deze cookie.
EU Cookie Directive plugin by www.channeldigital.co.uk