21 Moandag, 24 juni 2013 - Werkelijkheid en Verbeelding

> Categorie: KONINKRIJK KONKELFOES 3 Gepubliceerd: woensdag 03 juli 2013

 

Noa gister wördt alles anders veur mien, veul ik, as heufdpersoon in mien eigen schepping, Koninkrijk Konkelfoes. Het kan in dit land nieet zoo deurgoan, veul ik, as ik achter mien computer veur mien scherm zitte … . Ik tekene de werkelijkheid …, möör diee realiteit is nieet altied wenselijk …! As ik de gebeurtenissen ens ofwissele: een stuksken werkelijkheid …, een stuksken wenselijkheid … , ofwisseling van gebeurtenissen en verbeelding …, van ‘iszoo’ en ‘motzoo’,  beiden lèvert immers heel verschillende resultoaten op: het eerste is een gefabriceerde wärboel diee met meujte deur de burger nöör binnen te sloeken is, het tweede lèvert een smakelijke, natuurlijk egreujde en verwerkte vitaminerieke, makkelijk te verteren moaltied veur alle burgers op.

De ‘motzoo’- soep wördt dus oke ‘heel andere soep’!

 

De butenbelle geet. Ik kieke op het schermpken. Ik ziee de kop van de troubadour Gerard Rutger Buisman uut Steenwiekerland. Diee hebbe ik altied zoo eprezen um zien prachtige ballades en andere zangen, met zien partner Wilma. Möör dat kan nieet: hee is bienoa twee jöör weerumme oaverlejen, op één augustus tweeduzend ellef. O jeetjen, werkelijkheid of verbeelding is al begonnen. Ik drukke gauw op de blauwe button en rope: “Komt terin!” En ik renne nöör de veurdeure. Ik doo lös. “Tatatataal …”, zeg Gerard Buisman en hee zet zien flambard of en trekt zien eigen de böörd onder de neuze en kinne vandan. En wiee steet döör? Mien eigen Keuning Willem-Alexander! Ik wil wat ropen, möör hee leg de vinger op de mond: “Sssst …, ik magge nieet herkend worden”. Ik trekke hem gauw an zien mouwe nöör binnen en ik zegge: “Kon ik weten da’j noa zundag al zoo vlugge geestelijk op mien zollen inwerken?!”- “Tuurlijk nieet!” antwoordt Keuning Willem.

“Gerard van de oaverkante en Marietjen van rechts hebt oe trouwens ezieen Keuning … Willem-Alexander”. – “Gef niks, ze denkt heugstens dat ik een troubadour binne! Butendat meugt zee in onze verbeelding alles weten wadde wiej hier bekokstoafd! Wiej spölt oapen kaerte!” – “Hoe kump het feitelijk dat iej zoo mooi plat proat?”- “Deur oeweigen”. – “Ik wazze diee Willem Vondeling diee altied te late kwam op de bieëenkomsten van de ‘Strèèktaalgroep Dèventer en Umstrèken’, soaters de eersten van de moand in de “Notenhof”, vergangen winterseizoen. – “Möör iej proatten nooit mee!”- “Tuurlijk nieet: eerst luusteren en dan pas sprèken hef Vader Claus mien eleerd. En ik hebbe eluusterd en noe proat ik plat en ik vinne da’k ’t heel goed doo”. – “Niks op an te merken”, zeg ik.

Ik goa hem veur nöör mien werkkamer. Keuning Willem-Alexander zut metene op de hook van het logeerbedde “Koninkrijk Konkelfoes” liggen: “Hé, wat een mooie ofbèèlding van het Dèventer Iesselfront! En dan diee oranje en witte letters op diee blauwe achtergrond! En diee vief zwärte raven derboaven! Prachtig! Bint diee raven een symbool?”- “Op vief raven vinne wiej nauwelijks een witten: Hee stèèlt as een rave …; De raven zult hem gin brood brengen; As het oas lig in de graven, dan lacht alle raven; Bie wiee een rave kwèèkt, zult de ogen uutepikt worden.” – “Joa, joa, ik snap het. Het slöt allemoale op het politieke, godsdienstige, maatschappelijke, sociale en culturele lèven in stad en ummelanden; Emilio Romero is een witte rave.” – “Juust!! Keuning, iej hebt de köttel bie het schone ende!” – “Neum mien gin Keuning, Gerrit. Veur oe bin ik Alex, Alex van Buren. Wiej neumt mekäre gewoon bie de veurname, begrepen?” – “Joa Alex” – “Dan komme ik noe töt de zaak wöörumme het geet: de politieke constellatie in Nederland. Diee konkelfoezerieje steet mien echt nieet meer an! Döörumme gaf ik Bankrut diee hengst veur de kop. Het mot in ons landjen veranderen! Het mot op een andere toer, möör ik wete nieet hoe …!”- “Ikke wel …!”  - “Märn kom ik oe halen nöör Eikenhorst!” …… Dan schrik ik op töt de werkelijkheid … . Alex is verdwenen … .

 

Wij gebruiken één cookie, die essentieel is voor het functioneren van deze website. Lees meer: Privacy & cookies.

  Ik accepteer deze cookie.
EU Cookie Directive plugin by www.channeldigital.co.uk