13 Zoaterdag, 8 juni 2013 - Twee enden an "De CJV-ers"

> Categorie: KONINKRIJK KONKELFOES 3 Gepubliceerd: dinsdag 11 juni 2013

Het volgende had ik vandage op de laatste familiedag feitelijk zeggen willen:

“Döör bin ik dan met mien verklöring, Meneer de Veurzitter, leden, old-leden, donateurs, belangstellenden, met mien verklöring uut negentien drieeënvieftig, joa, iej heurt het goed, een verklöring van zestig jöör elejen. Ik zal hem oeluu èven veurlèzen: Verklaring – Het Bestuur van de Koninklijke Nederlandsche Voetbalbond, afdeling Gelderland, verklaart dat de heer G.W. Kuijk, lid der vereniging “de C.J.V.-ers” de cursus voor opleiding AMATEUR-CLUBLEIDER welke door de K.N.V.B. gedurende de maanden Juni, Juli en Augustus 1953 te Zutphen is gehouden, heeft gevolgd. – Het Bestuur van de K.N.V.B., afd. Gelderland. En dan komt de handtekeningen van de veurzitter en secretäris van disse ofdeling. En de handtekening van onze docent toen steet ter op: J. – van Jaap – van der Lecq, Oefenmeester.Jaap van der Lecq was toen tèvens trèner van het Nederlands elftal. En ik wazze as jonge trèner van viefentwintig jöör der trots op dat het bestuur van ‘De CJV-ers’ mien vroeg of ik veur hun club mee wol doon an diee cursus, möör veurzitter Koobs en de andere bestuursleden wisten oke dat een ärreme schoolmeester het forse bedrag van honderd gulden veur tien lessen nieet betalen kon. En ze hadden oaverlegd, en döör is Rinus ten Kleij zien vader oke nog debet an ewest as, geleuf ik lid van de elftalcommissie, dat, as Kuijk noa diee tien lessen de ‘Verklöring’ haalden, het bestuur van de club de cursus betalen zol.En ik heb het ehaald. Ik teune hier oe allemoale zestig jöör later disse verklöring. En ik magge mien nog altied amateur-clubleider neumen. ‘CJV-ers’, dank döörveur.De club geet noe oaver in FC RDC, Roda – Daventria – CJV-ers. An zien zelfstandigheid kump een ende, want an alles kump een ende. Möör gelukkig was ene van de oprichters van disse club slager van beroop: Steven de Wilde. En dus wist Steven meer en dat zei e ook altied as ik bie hem in de Sallandstroate in de slagerieje kwam: “Jonge, Gerrit, iej mot möör zoo rèkenen dat an alles een ende kump, behalve an een metworst, döör komt ter twee an!” En döör mot ik noe an denken. En al stoa ik hier noe as zoo völlen met blodend härte, ik ziee toch diee Cee veur mien van ‘CJV-ers’ en ik ziee döörin diee metworst van De Wilde: Van het ene ende bint de ‘JV-ers’ verdwenen straks, möör het andere ende bepoalt de tookomst van het nieje RDC, oftewel Roda-Daventria-CJV-ers en nieet meer Roda-Daventria-Combinatie! As amateurclubleider, nog steeds, bepoal ik noe, op dit moment, as dat nog nieet gebeurd is de nieje officiële name van RDC, zoo brutoal bin ik wel! De zoaterdavoetballers blieft bestoan in de Cee van ‘Erdeecee’.Toen mien vader, Gerrit Willem Kuijk senior, in het begin van de twintiger jören met de jongelieden van de Christelijke Jongelingsvereniging ging voetballen op het exercitieveld an de Roalterweg, was dat het begin van de Christelijke Jonge Voetballers. Ik memorere dat toch èven, want wat bint de tieden veranderd! In een boel opzichten is het ter nieet bèter op eworden, oke de sportiviteit is verslechterd. Gebeurden de meeste oavertredingen toen per ongeluk, vandage an de dag trapt ter een enkelen een anderen bewust het zieekenhuus in of nog erger. Vader wol bewuste sportiviteit. Volgens jonges diee met hem evoetbald hebt, had e een gezegde dat tegelieke humoristisch en oke ernstig was: “Denk an mien klok- en hamerspel!” Ik hove dat hier nieet uut te leggen! Ik zol noa negentig jöör tegen alle jonge voetballers van ‘RDC’ willen zeggen: Goat het veld in met ene gedachte, zooas in Prediker 9 vers 8a steet: ‘Laat Uw klederen wit zijn’, wat ik wil vertalen met ‘Behol de onschuld, wèès sportief, zooda’j in de felste duels oe niks hooft te verwieten. Denkt allemoale aan een ander zien klok- en hamerspel’.Meneer de veurzitter. Ik eindig met “Ende van “De CJV-ers”! Lang lève “De RDC”! Elk ende betekent een niej begin. Met dank an Steven de Wilde, Koobs, de Ten Kleijs’  en al diee anderen diee de “CJV-ers” edragen hebt en groot hebt helpen maken!”

 

Wij gebruiken één cookie, die essentieel is voor het functioneren van deze website. Lees meer: Privacy & cookies.

  Ik accepteer deze cookie.
EU Cookie Directive plugin by www.channeldigital.co.uk