9 Dinsdag, 14 mei 2013 - Dieenstböre Burgervader

> Categorie: KONINKRIJK KONKELFOES 3 Gepubliceerd: maandag 27 mei 2013

Precies um hallef viere lope wiej met zien beiden bie de ingang van de veurmalige synagoge, later Christelijk Gereformeerde Kerke, an de Golstroate 23 in Dèventer. As lid van ‘Vereniging De Waag’ bin ik uuteneudigd hier het honderd jörige bestoan van het museum De Woage mee te helpen herdenken. Döör stoa wiej dan, onderan de trappe nöör de ingang. Ik volle Ali haer rollator op en drage het dink nöör boaven. Ali beklimt de trappe met hulpe van haer Aldi-stok van vief euro.

Binnen is links de deure nöör de kerkzaal, rechts diee nöör het keukentjen en een kleine zaal. Wiej wordt verwezen nöör rechts um een köpken koffie of thee te drinken. Döör make wiej dankböör gebruuk van. Ik treffe der dalijk al een hele olde bekenden: Bram Emens, mien Knutteldorpse vrind uut begin tweeduzend. Toen zatten wiej beiden in de politiek veur Algemeen Dèventer Belang, ik in de gemeenteroad as nestor en Bram as de grote driever achter onze frisse ideeën. In 2002 kwam Bram in de gemeenteroad en hee is ter noe altied nog een härd werkend lid van veur de groep wöör ik Lid van Verdieenste van binne: Dèventer Belang. Oke een goeie kennis uut Diepenveen kump èven langes, wiel Ali en ik onze thee en koffie drinkt en ons ‘bijtjen’ nuttigt.

Um vief veur viere zitte wiej in de bomvolle kerkzaal. Precies um vier uur sprek Charles Boissevain, directeur van de Woage. zien öpeningswoord. Hee geet oaver alle gemeentemuseums van Dèventer. Noa hem kump Neelco Osinga an het woord. Hee is veurzitter van onze vereniging. Hee presenteert het prachtige jubileumbook, samenesteld en eschreven deur Henk Nalis, old archivaris van de gemeente Dèventer en nog dagelijks te vinden as vriewilliger in het “Ärchief”, zooas ik dat altied neume. Hee hef mien toentertied nog eholpen met het uutzeuken van foto’s veur mien “Een Dèventer Jonge in Oorlogstied”.

Um vief uur zal Burgemeester Andries Heidema bie de Woage de tenteunstelling “Rondom Ter Borch” öpenen. As inleiding döörop höldt Peter Hecht, hoogleraer Kunstgeschiedenis, noe een veurdracht oaver diee kunstenaer. Professor Hecht is oke bestuurslid van de “Vereniging Rembrandt”,  wöör wiej as vereniging nauwe contacten mee hebt.

Döörnoa höldt Andries Heidema de ‘Jubileumtoespraak’. Wiej zit allemoale met gespitste oren te luusteren. Zolle het hebben oaver de veurenommen opheffing van het museum De Woage? Of hef e genog alternatieven. De jubileumaap kump al gauw uut de mouwe: niks opheffing, möör een nieje constellatie, diee nog ‘samenesteld’ worden mot, möör wöörbie de beslissingen echt nieet enkeld bie de gemeentelijke oaverheid enommen worden zult. Onze erfgoedschatten bint oke bie “De Gemeente” veilig, möör dat het anders mot, dat is zeker. Andries krig toch wel een wärrem applaus.

Vlak veur vief uur is de zitting veurbie en wiej schufelt met de rollator nöör de uutgang. Wiej loat de validen  zoo völle meugelijk veurgoan. Eindelijk binne wiej boavenan de trappe buten. Ik volle de rollator op. Achter mien heur ik: “Laat maar, dat doe ik wel even”. Een grote hand nemt mien werk oaver. Beneden ziee ik Andries de rollator neerzetten. Hee kik lachend nöör ons umme. Dan löp e snel deur, want hee mot het lintjen veur Ter Borch deurknippen bie De Woage. “Een burgemeester die zijn burgers dient”, roop ik hem noa. Hee kik umme en lacht härtelijk. Azze wiej bie De Woage komt, is het lint net deureknipt. Het duurt een dik kwärtier veur wiej nöör binnen kunt. Ik heb een kaerte veur een gratis exemplaer van het book van Henk Nalis. Ali krig nog snel wat te drinken, wiel ik het book hale. Dan is het hallef zesse. Ik renne veuruut nöör de Verzetslane. Döör steet onze auto met pärkeertied töt kwärt veur zesse. Ik bin precies op tied! Ik rieje Ali tegemoet en pikke haer op. Mooie middag: Dieenstböre Burgervader.

 

Wij gebruiken één cookie, die essentieel is voor het functioneren van deze website. Lees meer: Privacy & cookies.

  Ik accepteer deze cookie.
EU Cookie Directive plugin by www.channeldigital.co.uk