8 Zoaterdag, 11 mei 2013 - Lèzen is meujlijk ...
Het löp al tegen twalef uur as ik nog wat boodschappen goa doon. Onze dochter, Lucy, hef namelijk opebeld en diee wil vandage veur Moderdag, dat is märgen de twalefden mei, met ons beiden uut èten goan. Wiej zult met haer en Rien, haer partner, nöör ‘Tracé 37’, an de Oranjelaan, goan. Ik heb döör al een töfelken veur viere besteld veur vanoavend zes uur.
Het is al wèken een verschrikkelijke troep in de Dorpsstroate. De weg deur het dorp wördt helemoale emoderniseerd um Diepenveen een bèter anzieen te geven en töt in juli zeker zal het centrum in de troep zitten. Iedere keer wördt ter een zoodoanig stuk anepakt dat de winkels, AH, Garage Kemper, Schildersbedrief Pasman, Bakker Van Rijssen, de Kringapotheek en Keurslager Harmsen met de auto bereikböör blieven kunt. Döör bint soms hele kunstgrepen veur neudig. Noe bieveurbeeld is het stuk stroate tussen AH an de ene kante en Pasman, Van Riessen en Kemper an de andere kante opebroaken en het is döör ene grote zandbak. Nöör Kemper kui’j enkeld met de auto oaver de stoepe! Een wit rond bord met rode dikke rand gef dudelijk an dat de weg helemoale ofesloaten is. Een roodwitte bärrière onderstreept het inriejverbod oke nog. Der hängt een wit bord met zwärte letters met een pijl derop nöör rechts wiezend, met de tekst da’j oaver de stoepe riejend toostemming hebt um nöör Kemper te riejen. Dudelijk toch!? Net da’k ter an kom lopen um langes de ofzetting oaver de stoepe nöör Van Riessen te goan um een slagroomtaerte te halen, schut veur mien met roazende vaert een blauwe ‘Skoda’ de stoepe op, het bördjen veur ‘Kemper’ negerend, en blokkeert de inrit nöör de garage! Een vent stapt uut en löp härd nöör de oaverkante. Ik stoa perplex en ik vergète het nummer van de wagen op te nemmen. Ik lope deur nöör Van Riessen. Döör bin ik metene an de beurte. Jammer genog hebt ze döör gin slagroomtaerte meer. “Maar ze zijn onderweg. Met een kwartiertje worden er nog twee gebracht. Appeltaart is er nog wel”. Ik zegge dat ik eerst wel èven wat boodschappen goa doon bie ‘Appie’.
As ik buten komme, schut Jan Kemper mien an. Hee zeg dat e der uut mot met de wagen en dat “diee Skoda” hem dwärs zit. Of ik de eigenaer kenne. Ik schudde van ‘nee’. Jan hef het nummer al bie AH loaten ummeropen, möör der kump gin mense. Ik goa mien boodschappen doon.
As ik weerkomme, steet Jan der nog. Wiej hebt ’t ter met mekaere oaver hoe stom het is döör een auto neer te zetten, notabene met diee anwiezingen diee der stoat. “Kui’j nieet deur het zand oaver de weg?” – “Proberen”. Samen sleppe wiej de roodwitte ofzetting opzied. Dan rit Jan veurzichtig de stoepe of het zand in, net tussen twee piketpöölkes deur. Hee zet de versnelling in zien twee en de banden pakt. Tussen de ofzetting en een piketpöölken deur rit e langzaam het verhärde deel van de stroate weer op. Dan zet e de boel weer op zien plaatse, noadat e eerst ‘Van Rijssen’ met zien bestelwagentje veur hef loaten goan.
“Der bint altied mensen met stront in de ogen”, zeg ik. “Ach Gerrit, iej mot möör zoo rèkenen dat lèzen veur een boel mensen heel erg meujlijk is”, antwoordt Jan. En de ‘Skoda’ steet ter nog steeds. Ik goa nöör de bakker en ik magge een slagroomtaerte meenemmen. Wiej hebt het ter in de winkel nog èven oaver, hoe slorderig de mensen in het verkeer bint. Wiej vroagt ons of wiee diee skodariejer is. Gin mense kent hem.
Als ik bute komme, is de blauwe wagen verdwenen. De stoepe is weer vriej. De mensen kunt de garage van Kemper weer bereiken. Ik blieve nog èven stoan kieken of ik de auto nog ergens ziee. Dan loop ik nöör Härmsen, wöör ik mien eigen auto epärkeerd hebbe.
Diee Jan Kemper toch. Gin verkeerd woord heb ik hem heuren zeggen oaver diee onbenul diee zien wagen zoo onmeugelijk epärkeerd had. En zoo ken ik Jan al jören. Dan mot ik härdop lachen. Mooie väststelling: “Lèzen is meujlijk …”. Diee holle wiej derin!
