GDD XXXIII Onbepoalde Veurnaamwoorden
Der bint veurnaamwoorden diee niks bepoalds anwiest en diee ginmense neumt. Ze wordt op ene hoop egooid en Onbepoalde Veurnaamwoorden eneumd.
Niks, Ginmense bint ter al veurbeelden van. De Nedersaksische talen kent ter een heleboel van, het Dèventers dus oke.
Hier volgt ter een stuk of twintig:
Wat – Ik hebbe wat ekregen (Ned. iets).
Niks – Niks an te doon (Ned. niets).
Emense – Emense zol der een härtverlamming van kriegen (Ned. men, iemand)
Ginmense – Ginmense is te vertrouwen (Ned. niemand, geen mens).
(Der)ene – Döör geet (ter)ene (Ned. iemand, de een of ander).
Ginene – Ginene hielp ter mien (Ned. niemand).
Eman – Dan wi’j eman graag helpen. (Ned. iemand).
Zonman – Is de geldnood hoge? Dan mot ze zonman steunen (Ned. iemand)!
Ze – Ze zegt dat hee gapt (Ned. men).
Iej, ‘j – Iej kunt nooit weten hoe of een koo een haze vangt (Ned. je, men)
Dan wi ’j de mensen toch graag helpen (Ned. wil je, wil men)!
Diee of diee – Diee of diee mot dat ezegd hebben (Ned. iemand, de een of ander).
Wiej, We – Zukke dinger doo wiej in het algemeen nieet (Ned. men).
Het, ‘t – Het ’t règent.
Der – Der wördt eklopt (Duits: Es klopft).
Iederene – Iederene zegt dat hee lög.
Allemoale – Allemoale meugt (ze) nöör de kärmse. (kan oke onbepoald telwoord eneumd worden)
Jan-en-alleman – Jan-en alleman hef vandage an den dag een auto.
Menigen – Menigen zol dat wel willen. (kan oke een onbepoald telwoord eneumd worden)
Geneumde woorden kunt enkeld zelfstandig gebruukt worden, behalleve WAT en het verdèventerste iets: IETSKES:
Iej mot IETSKES GAS geven. – Zee hef wel WAT ANLEG.
Ook bekend is het woord BEPOALD.
Der bint bepoalde mensen, diee ik nieet neume, diee niks egeven hebt!
Bepoalde is hier ook as bievoeglijk naamwoord an te duden.
