De Dichter
> Categorie: De Ravenstroater / Niesselt
Gepubliceerd: zondag 11 oktober 2009
Oaver dichten geet mien lèzing verder. Der bint immers onderwiesmensen, diee ook nog dicht, as amateur (zundagsdichters dus), of as beroeps (deur-de-wèèkse dichters). Eèn zon dichter he'k goed ekend. Hee dichtten nieet in het dialekt, möör in het Nederlands, en hee had bèter een deur-de-wèèkse dichter kunnen wèzen, want hee veulden zich gin schoolmeester. Oaver wiee ik het hebbe: JAN ALBERTUS RISPENS, diee lèèfden van 1889 - 1962. In de jören veertig tut viefenveertig van disse eeuw genoat ik de eer les van hem te hebben op de H.B.S.-B te DèVENTER. In diee tied dichtten hee ook al. As ik dit verhaaltjen an het veurbereiden bin, lig zien bundel 'Ora pro Nobis' of 'Bidt veur Ons' veur mien. Ik bin van plan diee helemoale in het Dèventers te bewerken. En ik wol noe graag al een klein veurpreufken geven van het werk van disse KUNSTENAER, want dat was MIJNHEER RISPENS. Ik zol zeggen: "Kom binnen bie Mijnheer Rispens". ----- ENTER. ---- Ik kwamme weer noa 'n bulte jören / In 't dörpsken, wöör 'k verbleve as kind, / Möör 'k wist het , enkelt um te klören / Wat elke pelgrim ondervindt. / De Brink, de kerke, olde bomen / En huzen restten van 't weleer:Möör wat de tied ons had ontnommen / Vond ik in enk'le härten weer. / Wie zatten in de kamer samen, / Wöör 'k nog de sfeer van vrogger von', / En 't wieje uutzicht deur de ramen Met 't koren, dat in schoaven ston'. / Wiej sprakken van vervloagen dagen / En in de pozen van 't gesprek, / Heurden ik, as toen, in eenteunig-trage / Moatgang de hangklokke deur 't vertrek. / Wie liepen ens nog d'olde wègen, / En toen 'k weer hen mos' nöör mien stad, / Kwam 'k as vanolds de kudden intègen, / Diee huuswaerts keerden oaver 't pad. / Zee gingen loom in ’t oavendpozen / Veurbie en 'k bleve, ze noazieend, stoan - / O weemood, diepe, grondelozen, / Van al wat is veurbie'egoan.Een veurpreufken he'k beloafd. Dat was dit. Iej hebt eheurd dat Mijnheer Rispens weerumme ging nöör ZIEN STAD; dat was Dèventer, wöör hee meer leed as vreugde ekend hef, wa'j in zien dichtbundels, enkelt nog antikwärisch te koop, kunt weervinden.
