De Regisseur

> Categorie: De Ravenstroater / Niesselt Gepubliceerd: zondag 11 oktober 2009
Logisch dat de onderwiesgevende as regisseur noe an de orde kump. Ik zette hier DE REGISSEUR dee ik uut het onderwies ekend heb - ze lef helaas al jören neet meer - hier veur oe neer. Het was een onderwiezeresse an een van de Brinkpoortscholen, II meen ik, möör het kan ook wel een andere opleidingsschole ewest wèzen. As ik haer echt as exempel gebruken wil, mot ik haer name hier nieet neumen, want wee haer ekend hef, weet noe al oaver wiee ik het hebbe, en diee waerdeert haer, möör een mense hef noe één keer nieet enkelt kennissen diee hem of haer allenig positief benoadert. Ik neume haer hier dus ZEE en HAER. Haer kracht lag in het lösmaken van geveulens ten opzichte van de persoon diee'j spöllen mosten, of het karakter dat iej verbeelden mosten. Ze liet oe goan in oew woord en bewèging. Ze zol oe nooit een rol spöllen loaten, wöör'j oe neet lekker in veulden. En de stukken diee ik onder haer regie espöld hebbe, dat wären der driee, werden allemoale in de olde Dèventer Schouwburg een groot succes. Het meeste resultoat had ze met "EEN EEUW ACHTER", een eenakter van Godfried Bomans, diee Janny Mulder, Willy Hollering, Wim Roetert en ik  (De Rave) met zien vieren mochten vertolken. In de huuskamers van onze olders hadden wiejvieren onder haer leiding erepeteerd. Dat was telkes weer een feest veur mien, ik kan natuurlijk neet veur Janny, Willy en Wim goan proaten. Wiee hun kent, kan der hun, denk ik, nieet meer nöör vroagen. In zeuven-en-veertig mos' ik in dienst. Toen was de samenwerking met haer ofelopen. In februäri acht-en-veertig kwam ik met t.b.c. in "Oog in Al" in Utrecht terechte. Met Haer en met Wim hiel' ik via mien meisjen, Ali, contact. Op 30 januäri 1949 kwam Zee mien met Wim in het "VOLKSSANATORIUM" in Hellendoorn (Helderen) opzeu­ken. Dat is noe  zoowat zestig jöör terugge. Veur Haer goa ik dee vieftien keer vier jöör in gedachten weerumme, en ik pakke het beuks­ken in handen dat ik toen van Haer en Wim krege, en ik lèze wat Zee döör namens haer en Wim in'eschreven hef. Ik citere: Als ik de vreugde niet in me had, Niets zou me dan vreugde bereiden; Als ik de Schoonheid niet in me had - Wat schoons zou me kunnen verblijden? Als ik de Liefde niet in me had, Geen Liefde zou me dan treffen - En als ik de Godheid niet in me had, Hoe zou mijn ziel zich verheffen?  H. A. Hendriks - Kappelhoff.  Voor onze beste vriend Gerrit Kuijk, met onze beste wensen voor een spoedige algehele beterschap.  Hellendoorn, 30 Januari 1949.  En dan komt de handtekeningen van de acteur, diee gin schoolmees­ter was möör een baas-teneelspöller, Wim, en van Haer, de Regis­seur

Feitelijk vin' ik dat ze de regie in het lèven is wat meer an zukke mensen oaver mosten loaten.Zee was tenminsten uut het goeie holt esnejen.  Hier lieeg ik nieet in kemissie.
 

Wij gebruiken één cookie, die essentieel is voor het functioneren van deze website. Lees meer: Privacy & cookies.

  Ik accepteer deze cookie.
EU Cookie Directive plugin by www.channeldigital.co.uk