Bakker Stegeman
Toen ik vieve was, gingen wiej met de bewaerschole uut de Rijsweerdsweg, Riesweerdseweg, met de köttelschole dus, nöör bakker Stegeman. Zien zönne Henkie zat bie mien in de klasse. Juffrouw Dubbe ging met ons mee. Pas völle lateder heurden ik dat zee een nichtjen was van Bé Dubbe, de latere personeelschef van Thomassen en Drijver an de Olde Holterweg. Verder wier zee noa de oorlog oke nog mien collega, want ik wiere in zeuvenenveertig schoolmeester.
Vanuut de Riesweerdseweg liepen wiej in een lange rieje, twee an twee mekäre bie de hand holdend, eerst deur tut de Sallandstroate. Döör gingen wiej rechtsof langes het huus van Inge Ekkel; diee zat oke bie mien in de klasse. Zee hef mien, geleuf ik, ens verteld dat haer opa cirkelzager ewest was bie Stoffels op de holtzagerieje en dat diee toen op Lombok woonden, een serie huuskes achter in de Lagestroate diee in de negentiende eeuw deur de firma Stoffel döör neerezet wazzen veur de holtärbeiders. Ik lieege dus nieet!
Dan gingen wiej linksof de Langezandstroate in en op de hook van de Ravenstroate gingen wiej rechtsof deur de Ravenstroate. Op diee hook woonden Henkie en Freddie Steenbruggen. Hun vader was koalenhandelaer. Zien moder had op diee hook, dunkt mien, een textielwinkeltjen.
Dan kwammen wiej langes het huus op de hook van de Hof. Döör woonden mien nichtjen, Geesje Meester, feitelijk Meister. Zee zat toen al op de Prinses Julianaschole.
Toen wiej veur de timmerfabriek De IJssel langes liepen, kwam an de oaverkante mien moder in het pertieksken stoan um tegen ons te zweien.
Noe gingen wiej linksof de Lagestroate in. Op de hook met de Ravenstroate woonden Dolleman, een heel olde nette man diee een beheurlijke functie bie Stoffels ehad had. Zien oldste zönne, Meneer Jan Dolleman, was hoofd van de Noorderschool II, wöör later vrindjes van mien hengingen. Met zien kinder, Jan en Dien, diee vake bie hun opa kwammen, spölden wiej op stroate. Noe ik eenentachtig bin, vind ik het altied nog machtig mooi, dat diee kleine Geit Kuijk van vief jöör in de jören vieftig ‘collega’ tegen Meneer het Hoofd der School mocht zeggen.
Dan kwammen wiej langes de dames Bonenberg, diee toen hun kano nog hadden.
Bie de spoorbrugge gingen wiej linksof tut de bakker op de hook van de Hoogestroate.
Achterumme gingen wiej. De bakkerieje was groot genog um ons allemoale te kunnen bergen. Stegeman liet ons zieen wat hee allemoale deej um broden van verschillende soort te maken: melkbrood, waterbrood, wit, bruun, tarwebrood, roggebrood, dubbelgebakken roggebrood. Ik wete nog dat het laatste brood verkocht wier onder de name ‘STEGEMAN’S ROGGEBROOD’.
Beschuut bakten hee nieet zelluf. Dat had hee, meen ik noe, van BOERSMA.
Hee teunden ons hoe of hee op een grote planke met een lange stelle wel vief brokken deeg gelieke in de takkengestoakte oaven liet gliejen. Ene jonge, ik geleuve mien vrindjen,Teun, mocht hem helpen. Wiej zuchtten der allemoale van en ik zagge dat ze allemoale vuurrood wazzen en ik veulden mieneigen oke gleujen.
Juffrouw Dubbe bedankten Meneer Stegeman veur de ‘aanschouwelijke wijze’ van werken.
En ik vroage mien noe of: Hadden wiej in diee tied noe medern onderwies of bint ze tegenswoordig zoo olderwets? Ik hebbe der een hoop an ehad! Toen ik in zeuvenendertig bie de padvinderieje stokbrood leerden bakken, wist ik precies hoe of ik deeg most kneejn. Ik hoofden mien enkeld möör Bakker Stegeman veur te stellen met zien witte sloof veur en zien witte pette op, zooas diee bie de kneejtoafel stond. Bedankt Bakker, ik denke nog vake an oe!
