26. 1985 ... Dieef ... 1949
> Categorie: De Liggende Vrèters
Gepubliceerd: donderdag 09 juli 2009
Dat meneer mien zon akelig kereltjen vindt. Möör ik holde zoo van keet maken! Ik zitte noast Eddie in de banke. Wiej bint an het rèkenen. Eddie zit met een magneetjen en een spieker te spöllen. Meneer kik onze kante op. Eddie leg gauw de magneet en de spieker in de pennegleuve. Hee geet härtstikke härd an het werk. Ik legge mien hand op het spul. Het härte klopt mien in de kèle. Ik schoeve alles nöör mien too. Ik schoepe het hem zo of! As hee opkik, is zien bezit vort. Ik kieke onschuldig veur mien, möör ik trille oaver mien hele lief. Hee stek zien vinger op. "Meneer, Gerrit heeft mijn magneetje uit mijn gleuf gepikt!""Is dat waar, Gerrit?""Nee meneer".Gelieke hale ik magneet en spieker uut de zak. Het härte klopt mien noe tut boaven in de kop."Die zijn van mij, meneer. Eddy liegt"."Is dat waar, Eddy?""Nee, meneer!""Geef maar hier. Dan is het nu van mij. We wachten maar eens rustig af". Dat is dus goed of-elopen. Ik siddere van onder tut boaven van spanning. Noe nog, noe ik het weer zee van hierboaven. Bange bin ik van mieneigen toch wel. De hoevölste keer is het wel nieet dat ik wat epikt hebbe? Geld uut de portemenee van mien opoe, een tientjen uut de binnenzak van mien opa, dropstellen uut de winkel van Vrouw Van der Kemp. En goa zoo möör deur. Tegenholden kan ik het wel, möör dat doo ik nieet; ik wete nieet wöörumme nieet. Esnapt worden wil ik nieet. Of toch? Rillen en bèven van mieneigen doo ik. Ik gruwele van mienzelluf. Mien ofkomst kenne ik zon beetjen. Tussen de veurolders van mien vader zit der ene wat nieet zon besten is ewest. Hee heetten Johannes, een name diee wel völle an lieefde en trouw verwachten dut. Nou, as ik zien lèven induke as een pielente in troebel water, blif der nog genog te zieen oaver.Vanuut mien hoge positie ziee ik een bakfietse stoppen veur de schole. 'GANTVOORT' lèès ik op de brune bak. Der wordt blikken beschuut nöör binnen edragen. Ik kieke weer in de klasse.Het schoolheufd geet onze klasse in. Hee waggelt as een ganze nöör meneer too en fluustert hem wat in.“Armen over elkaar!”Ik zitte dalijk recht."Er is een prinsesje geboren".Wiej begint allemoale te juichen en te klappen en met de voten te stampen. Het geluud van de klompen en schonen boldert deur het lokaal. Het wördt joechteren en heisteren! Ik klappe enkeld al, umdat meneer noe helemoale dat magneetjen wel vergèten zal. Opgelucht veul ik mien. Wiej kriegt beschuut met muuskes en een stamboom van de prinsesse diee pas geboren is. Ik rolle dee gelieke uut. Het prinsesken steet der egeenieet op. Der steet een vroagteken. Möör het geet in het verlejen tut Willem de Oude in 1500. Mien vader hef oke een stamboom van de familie. Is vroagen hoe wied dee weerumme geet. Meneer löt ons èven onze gang goan.Hé, döör ziee ik mien kleinzönne fietsen. Diee mos is weten dat ik hem hier kan zieen riejen op zien crossfietsken. Zeker driee kwetier hef hee nog neudig um bie mien flat te kommen.
