21. 1985 ... Zundag, 28 augustus 1949. ...
> Categorie: De Liggende Vrèters
Gepubliceerd: zondag 21 juni 2009
Gerrit is weer wakker … Hee denkt an thuus … .Zundes zit ze al vrog an de koffie, Moder, Vader, Gerrit en nieet veur het eerst zien meisjen, Ali. Gerrit zien zusken en zien breurs bint der nieet. Diee hebt andere dingen te doon, huuswerk en zoo meer. Ali en Gerrit zit mekäre stoadig met een glunderend gezichte an te kieken. Ze bint eerst nog erg zwiegzaam. Moder en Vader zegt oke nieet völle. Ze bint der vol van dat noe nieet enkel Gerritl uut het sanatorium in Hellendoorn, genèzen, thuus ekommen is, möör dat sinds hee zieek wier in 1948 Ali hem altied trouw bezocht hef en nog steeds bie hun over de vloere kump. Dat geet erg goed tussen diee twee! Gerrit kan an de geloatsuutdrukkingen van zien olders zieen dat ze best inenommen bint met disse anstoande schoondochter. Zo genieet ze allemoale in stilte.Dan begint Ali inens te proaten. "Gerrit, vertel jij nog eens over jezelf. Ik weet bijna niks van jou, al heb ik je wekelijks bezocht”. Het klinkt goed, al kui'j wel heuren dat zee nooit Dèventers eleerd hef. "Wat moet ik vertellen? Ik heb al bijna tweeëntwintig jaar van mijn leven achter de rug. Moet ik bij mijn geboorte beginnen?" "Jij moet beginnen met je eigen taal te spreken; dat vind ik veel mooier", antwoordt Ali. "Laat ik dan vragen, hoe jij dat sanatorium in Hellendoorn beleefd hebt". Der völt een dieepe stilte. Dan begint Gerrit rustig te proaten."Anderhalf jöör bi'k döör ewest. Dat weet iej. Elke volgende dag in diee tied keek ik weerumme. En dan viel de veurige dag steeds weer mee. Ik hebbe met pitrieet leren werken; ik hebbe goed schaken eleerd. Godfried Bomans he'k leren lèzen. Ik hebbe geduld eleerd. Ofwachten he'k eleerd. Kennis heb ik emaakt met de dood. Ik ziee nog Jans Wesseling van kamer 31 onze kamer opstormen onder het ropen van "Asse Lenters is dood". Asse was zien slööpken. Ik geleuve da'k erväringen opedoan heb, diee mien hele lèven zult blieven verrieken, altied achterof bekeken. Möör wat zag ik vake zwöör de toekomst in! Twee dagen bint veur mien härtstikke mooi ewest. Dat wären de kerstdagen veurig jöör, 1948. Diee wären as ik mien goed herinnere op een zoaterdag en een zundag. Möör diee dagen most ik zelf helpen "maken". Begin december kwam dokter Cornelisse bie mien; ik hadde net weer longfoto's ehad. Zee zei: "Mijnheer Kuijk, het ziet er allemaal goed uit. Tot vandaag heb ik U maar op een B-tje laten liggen, want ik wilde dat U goed beseffen zou, dat een kwartiertje per dag uit bed om naar de W.C. te gaan wel genoeg voor U zou zijn; de rest van de dag was U ook nauwelijks in bed! Maar nu krijgt U een C. U mag nu anderhalf uur per dag uit bed. En .... we gaan dieptefoto’s maken. Wie weet wat dat nog oplevert ....".Ik wazze de koning te rieke. Een C-tjen! Ik spronge subiet het bedde uut en gebruukten het eerste halve uur um mien olders en anderen deur te geven dat der schot in zat, in mien gezondheid. Toen liet ik broeder Beuker, onze zaalbroeder, panhering meebrengen van de visboer uut Hellendoorn. Dat mocht wel neet van de directie, möör de broeders wisten wel dat wiej ook of en too is èven uut de band mosten springen. Toen kroap ik weer in bedde, möör de andere mannen van de kamer trokken mien metene het middelste deeltjen, iedere matrasse hef immers driee deeltjes, in het sanatorium tenminsten, onder mien gat vandan; en ik kon mien bedde goan opmaken. Möör joa, dat bint noe eenmoal de rituelen. Dalijk dernoa kwam Heufdzuster Mik binnen. Zonder wat te zeggen trok ze een stool bie mien bedde en zei: "Mijnheer de schoolmeester, U bent nu zo goed; U kunt dit jaar het kerstfeest op Tweede Kerstdag 's avonds wel leiden". … .Gerrit had het geveul dat hee nieet zelf vertelden … ! Hee zag zichzelf zitten … ! Hee was zichzelf nieet! Hee dreumden … . Wiee was hee? Wakker worden … ! Het lukten metene… !Deurdat hee zoo weulden, wier hee weer goed wakker … . Tien veur hallef achte … .Hee ging der uut … !
