Gerrit wördt wakker. … Hee legt zien handen onder het heufd en hee denkt ande uutzichtstoren bie het sanatorium. Wat zol hee nog hebben kunnen zieen, as hee in zien kuurtied in 1948 döör gezond estoan had … ? Hee stelt het zich veur.
Op het pad achter het kruusgebouw, dat vandöör nöör de vrouwenofdeling löp, zut hee een kleine stoet goan. Goed kieken. Dat is vanof zien hoge plaatse met zien verrekieker neet meujlijk. Broeder Kampman, klein en vierkant, löp veurop. Achter hem hangt in zien handen een brancard, feitelijk een draagbaer, een stevig holten blad met vier dikke poten deronder. Achter löp Broeder Beuker, lange keerl met woeste krullen. Wieezienkop onder het witte laken uutstek, kan hee neet zieen. Het mot een keerl wèèn, want ze komt van de mannen-ofdeling. Heeweet wat der geet gebeuren. Diee mot een deurbrander hebben, anders wordt e nieet nöör de operatiekamer ebracht. Bie Gerrithebtze dat willen doon. Hee had een pneumo-thorax ehad. Dan bloast ze oe op as een fietseband. De lucht kump tussen het longvlies en het borstvlies terechte, deur een holle noalde, as ze pompt, en zoo wordt de longe in mekäre edrukt en diee hooft dan nieet meer te werken. Hee kump tut rust en hee genes. Toen ze döörnoa bie hem een foto maakten, zaggen ze dat tussen de beide vliezen, in de binnenband as het wäre, dunne spierkes liepen, zenen dus; de longe klapten nieet genog dichte. Diee spierkes mosten deur-ebrand worden. Dokter Vos is döör heel veurzichtig mee. A'j op de operatietoafel ligt, geet hee eerst kieken, noa plaatselijke verdoving. Hee maakt veurzichtig een snede, stek eensoort periskeupken met een lempken tussen de ribben deur en hee kik of hee te maken hef met bloodstrengen. Is dat zoo, geet de deurbrander neet deur; een bloding kan het gevolg wèèn, en ... veurtiedig ende veurstelling. Bie Gerrit was het bie kieken ebleven; hee had een dikke bloodstrenge; hee hef zien pneu möör een jöör ehad. Iedere veertien dagen keken ze of e bie-evuld most worden en veur hee nöör huus ging, lieten ze hem oflopen. Dat maakten het oasemhalen wel makkelijker.Toen hee op de draagbaer lag, zooas disse man, gebeurden der wat, wöördeur hee de zenuwen veur de operatie dalijk kwiet was. De broeders dejen kuntjen-wip um hun patiënt wat op te wekken. Broeder Beuker begon der mee. Hee veerden de draagbomen op, op het ritme van kun-tjen-wip-pen. Broeder Kampman nam het oaver. Dat hee verre oaver de honderd kilo woag, wisten ze nieet. Noa een wip of zesse, zei de baer in het midden 'krrrraaaa...k' en Gerrit zat op het pad as in een deur-eknakte zinkende vrachtboot. Deur de vensteroapeningen, in het sanatorium zit in de muren van de kuurzalen gin roeten, sprongen de foto-toestelbezitters in hoast nöör buten en maakten de mooiste opnamen. Ene dervan had hee thuus nog in een albumpjen. Verdreid döör hef-e ook nog eenkiekjen in zitten van het kreuningsfeest van Koningin Juliana. Dat albumpjen hef-e ewonnen met een spölleken 'Ja en Neen versta ik niet'. Wiee tien vroagen kon beantwoorden zonder ene keer ja of nee te zeggen, won diee pries. De foto wöörop Ilona hem de vroagen stelt, zit der in. … . Gerrit slöp weer in … .De broeders goat met hun slachtoffer de vrouwen-ofdeling in. Hee kik op zien horloge. Hee begint honger te kriegen. Het is al bienoa één uur. Oh gut, hee hefhetwärme èten veurbie loaten goan. Zien eigen breudjes mot-e noe wel èten, met koffie uut zien thermoskanne. Dee hef-e pas ekocht um in zien fietstasse mee nöör schole te nemmen. Tussen de middag mot-e oaverblieven. Eénuurkenpauze is tekört umme acht kilomèter nöör Dèventer op en neer te goan. Zien nieje Gazelle dut het èvenwels best. Ook al ekocht van zien achterstallige gage. En het mooiste is, hee krig invaliditeitspensioen van de Oaverheid. Wee dut hem wat!
