6. Uutzieen en Dreumen
> Categorie: De Liggende Vrèters
Gepubliceerd: woensdag 10 juni 2009
Gerrit völt weer in sloap … , dreumt weer oaver zon veertig jöör elejen. Wat een mooi panorama toch, denkt-e, as hee hechtend boaven, boaven op de Belvédère steet te kieken. Hee zut dat het hekke der nog stevig bie steet en leunt deroaver, kik recht nöör onder. Disse belvédère is zeker twalef meter hoge. Hee nemt zien verrekieker, ekocht van zien achterstallig onderwiessalaris; dat hef-e end juli op-ehaald bie de ontvanger Van den Hurk, in Olst. Op zeuventien november zeuven-en-veertig was e in militaire dienst egoan; zien anvroage um uutstel of vriestelling was of-ewezen, 'wegens persoonlijke onmisbaarheid'. Het bleek dat ze hem bie de officiersopleiding neudig hadden. Noe was der een regel dat as een soldoat bie het onderwies was, noa elf moand zien salaris veur tachtig procent deurging. Nou, officieel was hee op zeuventien juli negen-en-veertig hoaste twintig moand in dienst ewest, joa, wel zestien moand bie 'De Liggende Vrèters', de longpatiënten, möör toch! Hee had zien spöörpötjen van meer as achthonderd gulden mooi van Van den Hurk lös-epeuterd. Ongewild had e döörnoa zien olders ook nog een plezier edoan. Diee hadden het neet breed. Hee wist neet dat ze helemoale op zwärt zoad zatten. Zien vader deej zien eigen name, Kuijk, een boel ere an; nomen est omen, een kuik of kuuk was feitelijk een kleine koele of een bocht, en zien vader wist het onrecht goed in een valkoele te lokken en kon zich in een boel bochten wringen um zich stoande te holden. Gerrit had hem een flinke vodse van zien papiergeld in de handen edouwd: "Hier, veur oeluu". Zelf wist e egeeneet hoevölle. "Wöörveur?" "Iejluu hebt mien in Hellendoorn trouw op-ezocht; dat was duur!" Inderdoad was de reize tut noe too van Dèventer nöör Helderen een reis um de wereld: met de Oaveriesselse nöör Riessen, oaverstappen op de busse nöör Nijverdal, oaverstappen op de Wato-busse nöör Hellendoorn. A'j boften, ging diee busse deur nöör het sanatorium. Anders most iej driee kwärtier sjouwen.Zien moder kwam later bie hem: "Weet iej wat oew vader zei van diee centen? ... "Gerrit is een fein jonk; hee kwam net op tied; wiej hebt weer wat uutzicht!" Hee had de troanen in de ogen stoan".Hee heft de verrekieker; dee mot oke uutzicht bieden, ook ekocht immers van salariscenten, möör hee zut enkeld een mist; de glazen besloat van zien troanen. Eerst möör vègen. Hee kik richting Luttenberg; zut het heufdgebouw as een kruus: het rechte smalle lange stuk noa de ingang op de krusing oavergoand in de barak, noodruumte. Op de krusing geet ofdeling Rechts nöör rechts, ofdeling Links nöör links. Op Links hef hee elègen, kamer 32, met Jan Bennemeer, diee der nog is, straks èven opzeuken, meneer Donga, een zieekenverpleger uut Woensel; diee geet gauw nöör huus, Jopie Smit uut Hoogeveen, Karel Verkade uut Hengelo en Johan, diee hee vanmärgen op de Poggenbelt tegen-ekommen is, de legerdominee, diee hier gewoon bie 'De Liggende Vrèters' wol kuren. Hee weet dat in de gang op de krusing een buste steet van de olde Dokter Vos, vader van disse directeur; Het lik van hieruut een symbool van uutzicht veur de as Christus liejende mensen, dee hier binnen bint.Links van dit mannengebouw zut e wat hogeder de vrouwen-ofdeling. Döör is ook de operatiekamer, wöör heezelf oke deur Dokter Vos eholpen is. Nog verder nöör links lig' het ontspanningsgebouw, wöör hee 's zundes één keer in de veertien dagen nöör de kerke ging. Hee zut Dominee Verbeek Wolthuis veur zich. Dee had een mond as een mansbeksken van een örgeldreier, möör döör hoofden gin geld in; dat kwam deruut. Rechts ligt keuken, werkplaatse, garage en tuin. Mooi uutzicht … . Hee wördt wazig veur de ogen … !?
