3. Op de fietse. Dreum oaver een bezeuk ... september 2005
> Categorie: De Liggende Vrèters
Gepubliceerd: dinsdag 09 juni 2009
.. Zandweg uut. Opwippen. Klinkerweg op. Au! Wat knip dat deur in de konte. Ofstappen. Hee zut het al. Zokke achterband. Dee mot lek wèèn, dat kan neet missen; veurt e van huus gong, hef e den nog keihärd op-epompt."Lekke fietse?""Joa", zeg hee zonder op te kieken, "dan mot ik möör wieder lopend nöör Helderen"."Loa mar is zeen".Gerrit kik op en herkent. "Hé, olde liggende vrèter; Hoe geet 't met oe dan?""Hé, slöpien van mien, da's wa' een joor elene, da' we mekäre ezene heb'!"Johan keert de fietse op zien kop, dreit het achterrad, veult met de hand oaver de butenband."Hier, een droadnègeltjen, lik wa' nen spelde; èven plakken".Vakkundig licht e de band der of. Gelieke pröt hee deur: "Nog aait onderwiezer in hetzel'de darp?""Nog aait in 't zel'de dörpken, möör döör hef weinig an emankeerd. Toen ik of-ezweid wazze en weer goed-ekeurd veur 't onderwies, meldden ik mien bie onze burgemeester. Ik liet de bode hem zeggen, da'k mien angeven wolle um weer te beginnen. Eers' liet de burgervader mien langeder as een hallef uur in de wachtkamer zitten, en a'k binnen ware, trokke zien boeviejee nöör zieneigen too en zei: "Nou, nou, U bent ook knap dik geworden, meneer Kuijk. Zo kunnen de kindertjes U toch niet ontmoeten! Ik neem tenminste aan dat U weer beginnen wilt. Maar dat kan niet, hoor. Mijn zoontje komt straks bij U in de klas. Veronderstel dat U hem de tuberkelbacil aanhoest. Ik moet er niet aan denken".""En wat zei iej?""Da'k helemoale genezen ware, en dat mien 't werk gin moer meer schèlen kon, zoolange a'k möör gezond wazze. "Maar U moet mij wel mijn salaris doorbetalen, want ik ben voorwaardelijk goedgekeurd", riep ik.Ik zol wel noader van um heuren. Dan bi'k vot elopen en thuus op de banke he'k een pötjen liggen sjanken. "Wat kan 't oe schèlen", zei mien moder, "iej bint weer bèter, da's 't veurnaamste". En noe 't mooiste, de volgende mergen lei der een breefken in de busse, da'k möör beginnen zol. Ik had 't ewonnen. En noe ieje"."Ik bin weer dominee, woor 'k daoveur oke wazze, hier kört bie. Ik heb zoowat 't zel'de belèèfd as iej ook. Op 'n eersten kerkeroadsvergadering begonnen ze oaver het ofschaffen van 'n groten oavendmoalsbèker, want dat was neet hygiënisch genogt meer met dee theedook, dee langes de rand ewreven wier, as de wien van hand nöör hand gong. De luu mochten mekäre is besmetten met teebeecee. Ik heb möör niks ezegd. Noe hebt ze veur ik wete neet hoevölle kleine bèkertjes an-eschaft. Later krege ik nog te heuren da'k der völs te voldoan uutzagge. Möör wat wi'j? Ik bin twee meter en ik wège honderd vieftien kilo, umda'k bie de liggende vrèters ware. Ze zeien immers tegen ons: iej mot het oaver èten? Zoo, oew fietse is kloar. 'k Zal um èven umme dreien".Gerrit bedankten Johan veur de meujte, möör dee lachten: "Iej könt wieder nao Helderen, möör denkt der umme, da'j neet te dichte bie dee luu doa komt, want ze mochten oe is besmetten".Gerrit most glimlachen. Wee ens besmet was en positief was eworden, kon neet veur de tweede keer deur een derden besmet worden. Zoo had de schepping dat eregeld. Hee zweiden Johan noa, stapten op de fietse en reej richting Hellendoorn.
