Zwiet sloan. An Derk Willem Woertman (5-5-1934 töt 10-1-2010)
Oaver zwiet wol ik vandage (18-1-2010) schrieven en oaver zwiet sloan, oaver kracht, sterkte, snelheid, lenigheid en het döör oaver opscheppen dus. Möör zoaterdag 16-1-2010 las ik dat bericht: Na een ziekbed van enkele maanden is toch nog plotseling overleden onze lieve neef en dierbare vriend Derk Willem Woertman …. . Echt schrikken deej ik nieet. Een lieeve nichte van hem had mien een paer dagen derveur op-ebeld dat ik nieet most schrikken as ter een stervensmelding van Dick in de krante stoan zol. Zee wist immers van de schöörse contacten diee ik met hem onderhield.
Wat wist ik van Dick? vroeg ik mien of. In 1981 was hee schoolmeester in Brummen, want döör gaf ik in het kader van de IVB (integratie voorbereidende bijscholing) cursus an kleuterleidsters en onderwiezers um töt één basisschole veur kleuters en legere schoolkinderen te kommen. Wiej zatten dalijk op ene liende: dat ene schooltype most ter feitelijk nieet kommen! Dus döör wazzen wiej gauw oaver uuteproat. Wiej ontdekten nog meer gemeenzaams: Wiej hielden van onze streken, Salland en Oaveriessel, de Veluwe en Gelderland en … de Nedersaksische dialecten. Döör hadden wiej het oaver. Dick sprak toen al met wärmte oaver zien Opoes, zien Opa’s, zien olders, de kleren diee zee nog wel en diee zee nieet meer droegen, oaver de woorden en uutdrukkingen diee zee bezigden en wöör hee zoo graag de ofkomst van wol weten! Met dat leste zat hee helemoale op mien terrein, dat van de taal.
In 1983 nam ik ofscheid van het onderwies. Toen wist ik nog nieet völle van zien mutsenverzameling vanof 1850. Meschiens was hee nog nieet genog döörmee op streek um döör völle oaver te proaten. Hij wol trouwens toen al gin ‘zwiet sloan’ oaver zien kennis oaver de klederdrachten. Hee schepten nooit op, was altied èven bescheiden, was gin gorilla diee zich met de handen op de börste sloeg, zoo van ‘Ik bin de grootsten, de sterksten, de snelsten, de lenigsten … ‘. Integendeel. Dick ging stillekes en kundig zien weg, in zien onderwies, in zien lieefhebberiejen op folkloristisch gebieed.
Het middelnederlandse ‘swide’, ‘swinde’ (ned. gezwind), sterk in eigen oog, was nieet op hem van toopassing, nee, hee was een bescheiden, vrindelijke, geïnteresseerde, zachte man. Hee was anedoan deur al het schone um hem hen en … hee duldden gin leed!
Hoe of ik dit allemoale wete? In 1994 kregen wiej oaverniej contact met mekäre. In februäri namelijk begon ik mien serie ‘VERTAALD’- columns in de streekbladen van Wegener. Hee ontdekten mien rubriek en Dick begon onderwerpen veur columns an te dragen. Dat contact is ebleven töt 2001, toen as ik stopten met mien columns.
Ook in zien correspondentie sloeg hee weer gin zwiet. Vroagenderwieze legden hee mien onderwerpen veur en wiee mien columns nog is noales op internet zal resten van onze correspondentie antreffen.
Wiee oaver Dick zien veurtreffelijke gaven in-elicht wil worden kan altied terechte in de Bibliotheek Vereniging Veluwse Geslachten, wöör Mutsen en Streekdrachten in Gelderland en Overijssel in te zieen is, van Woertman D. W. en Herbert. J. As ik het wel hebbe is het nummer 69.
Zien streekmutsencollectie schonk Dick an een Klederdrachtenmuseum. Bie de oaverdracht döörvan mot hee zeer an-edoan ewest wèèn. Nee, zwiet sloan was ter nieet bie.
Noe is hee weerumme bie zien bron!