26. Schoolreisken 1956

> Categorie: Bie het onderwies Gepubliceerd: maandag 04 januari 2010

Op dinsdag 1 mei 1956 was Gerrit zien zönneken, Gerrit, één jöör eworden. Diee zellufde moand mosten de kinder diee nöör de HBS an de Burgersdiekstroate wollen, in Dèventer, tooloatingsexamen doon. Zee slaagden, mede deur het gunstige advies dat Gerrit an diee schole of-egeven had. Het wären der vieve. Één meiken ging nöör het Gymnasium an de Nieje Märkt. Zee wier enkeld op het gunstige advies van Gerrit too-eloaten Tot dan gebeurden dat nooit met leerlingen van de Rijksleerschole. Gerrit wist nieet hoe of dat kwam! Hee is het ook nooit an de weet ekommen. De andere kinder gingen nöör de ULO.

Het härde leren zat der noe veur de zesdeklassers op. Ze mochten heel ontspannen nöör de Grote Vakantie lèven. Gerrit besloat met de olders te oaverleggen of de kinder ter ofsluting van hun legere schooltied een meerdaags schoolreisken konden goan maken onder zien leiding. Hee riep alle olders op veur een vergadering in zien klasse. De opkomst was groot. Gerrit vertelden an de moders en vaders wat of hee van plan was.

Hee zol met de kinder een fietstöchtken goan maken van driee dagen: Op de eerste dag zollen ze fietsen deur Sallandse binnenwègen nöör Delden. Döör zollen ze oavernachten in een jeugdherberg, Jeugdherberg Het Iemenschoer. De tweede dag zollen ze dan fietsen van Het Iemenschoer nöör Vliegveld Twenthe en vandöör nöör Bad Boekelo, een zwembad met een golfslagbad. Dan fietsen ze weerumme nöör Het Iemenschoer. De derde dag zollen ze dan oaver Lochem weer nöör Dèventer peddelen. In Lochem zollen de kinder de uutzichtstoren kunnen beklimmen en nöör de Witte Wievenkoele goan.

Gerrit had het nieet verwacht, möör de olders wären enthousiast. Meschiens kwam dat oke deurdat de directeur van de Rijks Kweekschole, diee Gerrit zien onderwiesinspecteur was, een ‘pötjen’ had wööruut hee een flinke biedrage per kind lèveren wol!

En zoo gebeurden het. Op moandag half juni stapten Gerrit, de juffrouw van de eerste klasse en vierentwintig kinder op de fietse bie de schole an de Diepenveenseweg. Gerrit fietsten noast een grote jonge veurop, met zien padvindersfluite an een koord um de nekke, om de neudige tekens te kunnen geven. De juffrouw fietsten noast een meiken achteran, ook met een fluitjen an een tuiwken um den hals, um Gerrit bie biezunderheden te kunnen wöörschouwen. Het wier een prachtige tocht: Dèventer – Schalkhaar – richting Heeten – richting Haarle – Hellendoorn. Döör wier ezwommen in het zwembad “Het Ravijn”.

Toen ging het nöör Nijverdal – Enter – Delden. De twee oavernachtingen in de jeugdherberg wieren een feest. Het vlieegveld Twenthe met de Jachvlieegtugen was een belèvenis veur de kinder. Het bad in Boekelo lag onder een stroalende zomerzunne, toen ze in de golven leien.In Dèventer wieren ze weer ontvangen as gold het een wereldreize. Wat een tied!