22. Orchidee

> Categorie: Bie het onderwies Gepubliceerd: maandag 16 november 2009

Op zundag wier Gerrit zien zönne geboren. Het was op den eersten mei en Ali en hee wären metene härtstikke gek met de nieje wereldburger. Ze neumden hem nöör Gerrit zien vader, Gerrit Willem, wat betekenden dat Gerrit zelluf oke verneumd wier. Zien zönne was noe dus feitelijk Gerrit Willem III. Dat was mooi: senior, junior en junior jr.

’s Moandes nam Gerrit natuurlijk vriej van schole um de kleine jonge op het gemeentehuus in Schalkhaar an te geven. Hee was dus een uurken van huus. Het was twintig minuten fietsen nöör Schalkhaar, Skalkaer zooas hee altied zei.

Toen hee weer bie huus kwam, stonden hoast alle kinder uut zien klasse bie zien huus hem op te wachten. Ze haalden hem met gejuich en een ‘Lang zal die leven … ‘ binnen. De kinder waren de driee kilometer van de schole nöör Diepenveen met hun fietskes egoan, en diee lopend nöör schole wazzen ekommen, hadden ze achterop enommen. Dat was makkelijk zat, zeien ze, wan zee wären gewoon bie ‘LET op DEN ZIJWEG’ linksof egoan en zoo op Rande 70 beland. Ze hadden kans ezieen nog gauw een orchidee te kopen um diee in een vääsken an de kraamvrouwe an te bieeden. Ali had ezegd dat Meneer der nieet was, möör dat gaf nieet, zeien ze, want ze kwammen veur haer en de baby en op Meneer wachtten ze buten wel!

“Maar het is wel raar, de Juffrouw van de eerste klas, die getrouwd is met Meneer uit de zesde, verwacht een baby en die is bij U gebracht … !” Ze mosten der allemoale umme lachen. Ja, Gerrit had nieet an zien kinder verteld dat Ali in verwachting was.

Ali had wel evroagd hoe of zee an diee mooie orchidee kwammen. “Die hebben we bij Witteveen gekocht, de bloemenwinkel aan de Beestenmarkt”.

Ali snapten metene hoe of zee dus diee pèperdure orchidee hadden kunnen kopen. Ali’s olders wazzen immers de eigenaers van ‘Bloemenmagazijn Witteveen’. De kinder wären natuurlijk de winkel in-ekommen en hadden in geuren en kleuren verteld dat hun Meneer zien vrouwe een baby ekregen had en Ali’s moder had natuurlijk evroagd wöör Meneer woonden. In Diepenveen, hadden de kinder natuurlijk ezegd. Moder had onmiddellijk deur ehad dat Gerrit diee Meneer was …, ze had de kinder de duurste orchidee ‘verkocht’ diee ze in de winkel had. Zoo was dat natuurlijk egoan.

 

Dinzes trakteerden Gerrit alle kinder van zien klasse op beschute met muuskes. Toen ging hee nöör zien schoonmoder too an de Beestenmärkt. Hee stapten de winkel in. Hee wol van zien ärmoedjen de volle pries van de orchidee betalen. Möör Moder lachten dat stroalend weg: Diee kinder wären toch zoo bliej dat hun Meneer een baby had ekregen veur diee Meneer uut de zesde klasse! “Ik heb der zelluf gewoon skik van”, zei zee.

 De orchidee deej hem nog meer holden van zien klasse, veural oke umdat diee aktie van de kinder zoo spontaan ewest was en … , umdat hee feitelijk völs te streng veur disse kinder was vanwege hun grote onderwies-achterstand. Möör gelukkig was diee tegen de Grote Vakantie beheurlijk in-elopen. Hoewel hee toch al nooit kinder ‘had loaten zitten’, bie de ‘oavergang’, was dat noe al helemoale nieet neudig. Iederene stond stevig op de vloere van wat bie oavergang nöör de zesde klasse vereist was. En zoo ging hee vol goeie mood de Grote Vakantie in um te genieeten van Ali en Gerrit Junior!