18. Sunterkloas 1952

> Categorie: Bie het onderwies Gepubliceerd: maandag 19 oktober 2009

Op ene van de vergaderingen van de NOV Olst-Wijhe in het veurjoar van 1952 was besloaten dat de kinder uut de klassen viere, vieve, zesse en zeuven tooken jöre nieet meer nöör de Sunterkloasuutvoering van “Volksonderwijs” in Dèventer goan zollen. Het wier allemoale völs te duur. Toen dat besluut enommen was, keken alle leden mekäre an, döörnoa gingen de blikken noa Meester Mentink. Hee was immers regisseur van de teneelvereniging van ‘Het Nut’ in Olst. Meester deej net of zien neuze bloojden en keek ernstig noa iederene weerumme.

 

“Iejluu wilt wat van mien?”

 

“Wat dach’ iej wat?!” antwoordden der ene uut Wieje. “Wiej goat zelluf een stuk opvoeren veur de kinder en iej bint de enigsten diee regisseren kan!”

 

“Nou goed, ik wil regisseren, moa dan mot iejluu zörgen dadde wiej een echt leuk stuk veur de kinder hebt.”

Triomfantelijk trok Meuleman een dun beuksken uut zien binnenzak. Hee reikten het an Mentink oaver. Diee las härdop veur: “Joppie bij de zigeuners … “.

 

Gerrit heurden al nieet meer wat ze verder zeien, want … hee ging weer teneelspöllen, wat hee veur zien kuren in Hellendoorn oke zoo graag edoan had met Wim Roeterd, Jannie Mulder en Willy Hollering, onder leiding van juffrouw E.J.Doornbos.

 

Noa de zomervakantie wier der metene begonnen met de repetities in Zaal Dalhuizen an de Veerweg in Olst bie Jan Pannekoek en Minie Dalhuizen, de olders van Cootje en Willy Pannekoek. Joppie, diee bie een troep zigeuners terechte kump, bie een ongeregeld zeutjen dus, wier espöld deur Herman ten Kampe, Gerrit zien vrind en collega uut Wesepe. Gerrit zelf was de heufdman van de zigeuners. Een tiedelijke collega uut Olst, diee iemand verving, spölden een zigeuner diee een aapjen an een liende had, Siempie Dakgoot. Diee name hef hee altied eholden!

 

Schoolmensen meugt dan serieuze luu wèèn … , toch wier der heel wat ofelachen, veural as ter iemand zien of haer rolle es weer kwiet was. Meester Mentink wist döör wel road op: “Iej stoat toch achter Kuijk in disse scène; plakt hem oew rolle möör op de rugge, dat zut gin mense!” En aldus gebeurden.

Gerrit most hele olde kleren anhebben, escheurd en voel. Hee zocht een heel old colbertjen en hee trok dat binnenste buten an. Het was gin gezichte. Zoo strompelden ze stuk veur stuk hikkend en lachend oaver de planken tut de opvoering, de eerste opvoering. Diee was in het Oranjehotel in Wieje.

 

Het wier een enorm succes! Veur ene van de spöllers was der trouwens altied een boddel ewest, in de pauze bie de repetities. Hee rèkenden derop dat diee der noe in de pauze oke wel weer stoan zol! Ja heur, het glèèsken stond klöör! Hee sloeg de boddel achteroaver en gelieke heurden hee: “Hee, smakkerd, je drinkt mijn medicijn op!”

Het bleek het drankjen te wèèn van ene van de dames in de oavergangsjören. Achter de coulissen brak een enorm gelach uut.

 

Hadden de kinder in Wieje al genoaten, diee in Olst dejen dat nieet minder! Op schole proatten ze nog dagen noa oaver het feest.

Zoo noaderden de kerstvakantie! Gerrit was ter härd an too!