10. De Ennevee
Al in Hengforden wier Gerrit in 1949 lid van de N.O.V., de Nederlandse Onderwijzers Vereniging, wöör de meeste leerkrachten van het openbäre en biezunder neutrale onderwies bie anesloaten wazzen. Natuurlijk hadden de rooms-katholieken en de christelijken oke hun vakbonden, de oorlog had immers niks veranderd wat dat anbelangt. De schoolstried ging op de olde voot deur. Iej konden noe al merken dat de deurbraak hoastens mislukt was! Gerrit dacht döör möör nieet te völle oaver noa. Hee ging gewoon zien gang.
Penningmeester was het schoolheufd uut Den Nul, gemeente Olst, in de buurtschap Duur, wöör oke de Duurse Weerden laggen. De gemeente Olst kenden trouwens vief openbäre legere scholen: Hengforden, Wesepe, Welsum, Den Nul, Olst.
In het winterseizoen vergaderden de “Ennevee” driee, vier keer. Der wier een sprèker uuteneudigd of der wier wat enööld met mekäre, veurnamelijk in het plat. De mannen sprakken allemoale plat, de vrouwen gene van allen, möör zee verstonden het donders goed. Alle schoolmeester en –juffrouwen verstonden gelukkig plat, oke diee uut Wieje; diee wazzen der tèvens bie.
In het veurjöör, hallef mei, was de jöörvergadering. De veurzitter, de penningmeester en de secretaris hadden allemoale hun jööroaverzicht en veural nöör het verslag van de penningmeester wier met spanning uutezieen. As der een flink kassaldo was, trakteerden hee op een heus klein ètentjen! En dat veur vieftien man! En hee was nog wel zoo zunig.
De jöörvergadering vond altied plaats bie ‘Hotel Dalhuijzen’, Dalhuzen. Wöörumme? De eigenaer, Pannekoek of Pannekoke stond der umme bekend dat hee zukke lekkere rolpens inmaakten. En dat atten ze altied, diee onderwiesmensen, as ze bie Pannekoke vergaderden. Gerrit was ter trouwens oke härtstikke gek op. Zien collega’s wären bliej dat Gerrit zoo goed at. Ze wisten dat hee anderhallef jöör ekuurd had in Hellendoorn. Veural Meester Mentink uut Olst, biename Gait Piep, was altied erg met Gerrit begoan, meschiens was dat wel, umdat hee oke Gerrit heetten. Het kon natuurlijk ook wèèn dat hee zelluf vrogger wat met de longen ehad had. Trouwens, zee leken döör in de gemeente Olst wel ene grote familie. Der was nieet enkeld zakelijke betrokkenheid, möör oke een sterke perseunlijke binding! Met meujlijkheden konden ze altied bie mekäre terechte.
Met de collega’s uut de gemeente Wieje, Wijhe, was de verstandholding heel goed, zoo goed dat ter in beide gemeenten samen möör ene ofdeling van de N.O.V. was, de Ofdeling Olst – Wieje. Dat had Gerrit emerkt bie de lèzingen oaver onderwiesverniejing, wat deur alle collega’s onderwiesvernieeling eneumd wier. Diee lèzingen wieren eholden deur een collega van de Noorderschool I uut Dèventer, Cornelis Wilkeshuis, diee döörveur deur de inspectie uutekoazen was, wiel hee zoo goed kinder- en jeugdboken schrieven kon. Veurlèzen en vertellen kon hee oke as de besten! Möör bie het verniejen van het onderwies leunden hee helemoale op Meester Meuleman uut Olst, het nieje heufd döör. Diee kwam van de drieemansschole in Loarnse Brook, wöör hee gewend ewest was individueel onderwies te geven! De schole in Olst was een viefmanssschole en hee had zien onderwiessysteem uut Loarnse Brook zoo oavereplant nöör zien viefde en zesde klasse in Olst. Zien collega’s hadden eerst wel heel gek stoan te kieken toen zee kennis maakten met zien werkwieze. Hee werkten met belangstellingscentra. Döörbie koas hee bieveurbeeld een onderwerp uut de Vaderlandse Geschiedenis as de VOC. Dat zetten hee in het middelpunt. Döör umhen zetten hee aerdrijkskunde, rèkenen, taal, lèzen, zingen enzoowieter. Hee werkten nauw samen met Meester Mentink, diee oke een deel van de viefde klasse les gaf en een echte geschiedeniskenner was. Diee werkten, ondanks zien gevorderde lèèftied, viefenvieftig, met lieefde mee. Nee, in Olst was het onderwies gin verrotte zaak!