88. Simpele Soep - Makkelijk Zat

> Categorie: Literatuur Gepubliceerd: vrijdag 26 februari 2010

Simpel denken: Wiee zien ogen lös hef, kik nöör de wereld in zien tied – Wiee zien ogen slut, kan schouwen in de eeuwigheid, in het Grote Niks. -  De betekenis van het bestoan is het bestoan op zien eigen. – Zoo is de zin van  mien wèèn dat ik ter bin. - En wiel in de wereld de Hongerigen rot in ärmoe en völle mensen verhongert in kampen, stoa ik hier met de ogen dichte simpele soep te maken en ik probere döörbie in de Eeuwigheid te schouwen: simpele, simpele, simpele soep. – Anderen meugt der nog egensnieet an roeken. – Ik nemme ene liter zuver helder water, wat zee nieet kent, - een hallef pond mager runderpoelet, wat zee ontberen mot.- Ik doo der wat zolt bie, wat zee nieet kunt betalen. – Ik breng alles an de koak, zonder gehakt. – Noe loat ik het twee uurkes trekken. – Heerlijk, wat een boeljon. – Noe nem ik een tweede liter zuver helder water. – Ik dreije zesentwintig balletjes van een half pond mager rundergehakt. – Zolt, witte peper, notemuskaat, dat ging in het gehakt. – Ik koake de boeljon met dat geheel derin. – Ik nemme een pak middelkrulvermicelli. – Ik kniepe dat grof in de panne met runderpoelet, balletjes, kruden. – Met de ogen dichte roer ik en beschouwe de uutgemergelden diee op de geur ofkomt en roekt an mien simpele soep. – Noa vief minuten zachtjes deurkoaken een päksken gedreugde soepgreunte derbie. – Roerend doo ik het in de panne. – Vief minuten zachtjes deurkoaken. – Preuven met de ogen dichte, de uutgeteerden stoat reikhalzend um mien hen. – Wat een tandentergerieje! – Nöör smaak zolt en boeljonpoeier derbie doon. – Tweeënhalleve liter simpele soep is klöör. – Simpele soep? – Ik slute de ogen. – Ik kan het nieet bèteren döör. – Wat mot ik doon. – Mot ik het Grote Niks ingoan? – Döör hef gin mense wat an. – Ik dieene de soep op. – Mien vrouwe smult. – Ik ète toch met smaak! – Möör ik hebbe de ogen dichte … ! 

Ik schame mien … ! Toch möör geven an goeie doelen? … Dat doo we al zoo lange … ! Niks schient te helpen … . De wereld geet nöör de bliksem … De wal keert het schip. Ik doo de ogen dichte, schouwe in het Grote Niks … Simpele Soep wördt onze Ondergang … ! Makkelijk zat! Simpel … !Möör … as de rieken de ärremen grei geeft, kunt diee zelfs keistenen nog töt een lekkere moaltied maken. – Dan wördt bie hun oke de simpele soep egèten, al wördt diee heel heite opedieend. – Simpele Soep – Makkelijk Zat!