87. Geldgier

> Categorie: Literatuur Gepubliceerd: donderdag 25 februari 2010

  Oaver geleuf esproaken:

Ik kenne een keerl,

zien name mag ik oeluu nieet zeggen,

diee hef iedere nacht, zeg e, een gesprek met de Vader,

diee hem precies vertelt,

want diee Vader is een gerespecteerd financieel deskundige,

hoe of hee, diee keerl dus van wiee ik de name nieet neumen mag,

zien gelden beleggen mot,

welke fondsen of hee kopen mot of verkopen.

Diee man vöört blind op het Kompas van diee Vader.

Vader in Den Hemel, geef mien road, zeg hee dan.

Hee zeg dat hee dan an het bidden is.

Disse keerl is noe miljärdair.

Möör hee geet deur!

“Want”, zeg hee, “nooit kan het geleuf te völle verwachten”.

En: “Geleuf alleenlijk en al het andere zal oe too-eworpen worden”.

Möör dat zeg hee in het Nederlands,

want dialect sprèken tegen de Vader is onfatsoenlijk.

Hee geleuft het echt!

Zon geleuf ontbrek mien Goddank!

Möör ik worde dan ook nooit rieke.

Zien geleuf neum ik Geldgier.

Hee is een geldgier volgens mien!

Möör dat zeg ik hem nieet.