410. Brieef an Jan Terlouw

> Categorie: Literatuur Gepubliceerd: zaterdag 03 december 2016

Diepenveen, 3-12-2016.

-----

An Jan Terlouw.

-----

Beste Jan,

-----

Reageren op oew toospraak völt mien wel een beetjen zwöör. Toch kan ik het echt nieet loaten en dus doo ik het noe toch möör.

Wat iej zeien, kwam uut oew härte, ook al sprak iej met verstand. Ik krege de troanen in de ogen, as een boel mensen in het land. Iej gavven de politiek een lesjen in haer doon en in haer loaten; nöör ik hoape, goat ze vereend oaver oew prèke flink noaproaten.

Is het toeval dat oew rede viel in de advent? Of was dit een boodschap diee iej uut oew biebel kent?! Oew vader kan trots op oe wèzen en oew moder èvenens, want ze könt wel constateren dat het oe geet um De Mens!

Meschiens könne wiej samen met anderen op oew woorden wieder goan, met völl’ mensen van goeden wille de handen in mekäre sloan. Möör dan mo’j wel èven bellen, zoodadde wiej ofsprèken kunt, want een vervolg op oew prèke is van härte oe egund.

Jan, ik wolle nog meer zeggen, möör dat doo’k wel es in ’t echt. Het veurnaamste wat ik kwiet wil, heb ik hier al wel ezegd.

-----

Van disse kante noe de groeten van een Diepenveense vrind, diee oew DWDD-rede nog altied geweldig vindt.

Crödde van Niessel

(Gerrit Kuijk)