408. Totale Opbrengst?
Geleuf alleenlijk en …
al het andere
zal oe
too-eworpen worden
-----
Henkie ging nooit nöör de kerke:
Zien olders wazzen atheïst.
Hee wol der toch welens goan kieken,
met vrindjen Gerrit, gin antichrist.
-----
Samen dus nöör de Grote Kerke.
Beteuverd keek e in het rond
deur ruumte, schoonheid en de ramen
en ’t prachtige orgel wat ter stond.
En toen dat dan begon te spöllen
schitterend en schalmend luud.
zag Gerrit dat zien ogen stroalden!
Henkie kon der nieet oaveruut.
-----
Eerbiedig volden e zien handen
onder het lange dankgebed.
En Gerrit zag, toen e opziej keek,
zien ogen glinst’ren van de pret.
En toen de lange gärde rond ging,
met dööran de collectezak,
zag e hoe Henk heel ärg gretig
zien rechter hand döör dieepe instak.
-----
Toen ze later buten liepen,
zei e: “Geit, ik bin heel bliej!
Ik heb een vierduit etrokken!
Mag ik vroagen: Wat heb iej?”
-----
Noa dat eerste kerkbezeuksken
ging onz’ Henkie nog een keer.
Hee is noe een steilrecht christen!
Gerrit … diee kerkt allang’ nieet meer!
-----
Blif natuurlijk disse vroage,
diee iej vast wel hebt verwacht:
Wat hebt al diee kerkbezeuken
Henkie feitelijk op’ebracht?
-----
Diepenveen, Woensdag 30/11/2016
