394. Dóódzunde

> Categorie: Literatuur Gepubliceerd: dinsdag 01 november 2016

Ook veur woordofleiders

-----

Onze huidige woordofleidkunde

weet nieet goed weg met het woord ‘zunde’.

Hoast oaveral völt ter te lèzen

dat het zoowat is as ‘schuldig wèzen’.

‘Wèzen’ is ’t zelde dus as ‘zien’.

Diee ofkomst diee verwondert mien,

want wöör kump ‘schuldig’ dan vandan!

Ik geleuve döör dus g’heels niks van

-----

Een zunde is een oavertreding

en zeker ook een fout.

En wiee een oavertreding maakt,

diee handelt domweg stout.

Verzeuning noa het boeten,

dat is een heel goed ding;

dat is zooas het vrogger

bie ons in huus tooging.

-----

Een kus of zoen dan noa diee tied

en al oew zunden waer iej kwiet!

Zunde en zoen heurt as het wäre

as breur en zuster bie mekäre.

Neum iej dat volkswoordofleidkunde

Geliek hei’j dan, möör dat is gin zunde

Bèteder volksetymologieën

as vermeende ofstammingstheorieën

Bie geleerden ontbrek vake echte kunde!

Ik zegge oe eerlijk: Dat is wel zunde!

En zelfs dóódzunde!

-----

Crödde van Niessel – Moandag, 31 oktober 2016