388. UPPERMAN & UPPERVROUWE

> Categorie: Literatuur Gepubliceerd: dinsdag 18 oktober 2016

 

Zeuventig jöör ben ik al upperman

en ik drage nog steeds de stenen an:

de bouwstenen

diee menskes mot verstouwen,

wilt ze betrouwböre eigen huzen bouwen.

Honderden mannen en ook vrouwen

uppert al eeuwen mee

bie dat verstouwen,

wöör jonge mensen

al heel vrog mee begint,

as ze nog möör nauwelijks

de wieege uut bint.

Ik uppere noe nog daaglijks,

letterlijk en figuurlijk.

De eigenhuzenbouwers

vindt dat heel natuurlijk.

Ik uppere veur allen

tut ze mien könt missen!

Hoeneer dat is?

Ik kan mien best vergissen,

möör diee tied kump nooit,

nemt dat möör an!

In hun volwassenheid

goa ik gewoon vedan!

Ik bin noe al jören

upperman op internet.

Ook uppervrouwen

hebt zich döör al inezet.

Zoo heb ik nog steeds een dieenend lèven,

meschiens nog lange,

meschiens nog èven.

Uppervrouwe en Upperman,

Goat toch samen stug vedan!

Loat de mensen vol vertrouwen

an hun lèvenshuzen bouwen.

Meester, oew upperen geet altied deur.

Juffrouw, ik weet, iej goat ter veur.

Joa, ik weet dat iejluu baalt:

Werk onbetaalböör, dus slecht betaald!

-----

Upperman Crödde van Niessel – Dinsdag, 18 oktober 2016.